Bu gün bəşəriyyətin ən böyük problemlərindən biri məhz qlobal istiləşmə və ya iqlim dəyişikliyidir. Artıq bir neçə ildir ki, elm adamları bu problemin həlli üçün çıxış yolları axtarır. İndi isə alimlər iqlim dəyişikliyi problemini okeanlar ilə həll etməyin yeni yolunu tapıblar. Hətta bununla bağlı 200-dən çox alim birləşərək işə qoyulub. Əlbəttə bir çoxumuz atmosferdə olan iqlim probleminin əsasən CO2 adlandırdığımız karbon qazından qaynaqlandığını bilirik. Avtomobillər, fabriklər, zavodlar və digərləri həyatımızın bir hissəsinə çevrilsə də sonumuzu gətirə bilər.
Düzdür artıq bir neçə ildir ki, avtomobillərin, fabriklərin və zavodların C02 emissiyası azalır. Hətta elektromobillərin bazarda üstünlük təşkil etməsi bu vəziyyətə ciddi dərəcədə təsir göstərib. Lakin alimlər daha həlledici yollar axtarır. Məhz bu yollardan biri də okeanlardır. Yəni alimlər iqlim dəyişikliyi problemini okeanlar vasitəsi ilə aradan qaldırmaq istəyir. Ümumiyyətlə yer planetinin böyük hissəsi okeanlar tərəfindən zəbt olunub. Çoxluq təşkil edən bu okeanların isə heç bilmədiyimiz bir xüsusiyyəti var imiş. Belə ki, okeanlar özlərində çox böyük miqdarda qaz depolaya bilir. Alimlər bu xüsusiyyətdən istifadə edərək karbon emissiyasını azaltmaq istəyir. Hətta bununla bağlı araşdırmalara da başlayıblar.
Okeanlar ümumilikdə atmosferdən böyük miqdarda karbon qazı udur və özündə saxlayır. Lakin okeanların da bir limiti var. Yəni sadəcə müəyyən yerə qədər qaz depolaya bilirlər. Alimlər düşünür ki, yeni texnologiyalar ilə okeandakı karbon qazını süzə bilərlər. Nəticədə isə okean daha çox karbon qazı uda bilər. Bu fikir möhtəşəm səslənsə də, bəzi mənfi nəticələrə yol aça bilər. Okeandakı həyat məhv ola bilər. Məhz bu səbəbdən hələlik araşdırmalar davam edir.
