3D çap texnologiyası artıq kiçik ölçülü məhsullarla məhdudlaşmır. Belə ki, artıq mənzil sektorunda da 3D çap möhkəmlənməyə başlayıb. Lakin bu evlərin təbii fəlakətlərə davamlılığı indiyədək real olaraq yoxlanılmayıb. İngiltərənin Bristol Universitetinin tədqiqatçıları bu çatışmazlığı aradan qaldırmaq üçün inqilabi araşdırma aparıblar. Beləliklə, 3D çap texnologiyası ilə hazırlanmış bu evlər ilk dəfə olaraq zəlzələ şəraitində sınaqdan keçirilib.
Universitetin SoFSI (Soil Foundation Structure Interaction Laboratory) laboratoriyasında hazırlanmış nəhəng simulyator zəlzələyə davamlılığını yoxlamaq üçün strukturları silkələyir. BBC-nin də yaxından izlədiyi bu layihə dünyada belə strukturlar üçün aparılan ilk real seysmik sınaqdır. Simulyator üfüqi hərəkətlərlə böyük stolun üzərinə quraşdırılmış konstruksiyaları silkələməklə mümkün zəlzələ zamanı strukturun necə reaksiya verəcəyini müşahidə etməyə imkan verir. Zəlzələ mühəndisliyi professoru Anastasios Sextosun rəhbərlik etdiyi komanda həm əldə edilən məlumatlar ilə struktur dizaynerlərini məlumatlandırır, həm də daha təhlükəsiz və daha əlçatan mənzil üçün yeni standartlar hazırlayır. Bu tədqiqatdan əldə edilən məlumatın lay bağlama strategiyaları və möhkəmləndirmə inteqrasiyası kimi seysmik performansı optimallaşdıran dizayn parametrlərini müəyyən etməyə kömək edəcəyi gözlənilir.
Sınaqın məqsədinin 3D çap evlərində təhlükəsizlik və xərclər arasında ideal tarazlığın yaradılması olduğu vurğulanıb. Bu tədqiqatların əhəmiyyəti xüsusilə aşağı gəlirli bölgələrdə və zəlzələ riski yüksək olan coğrafiyalarda artır. Simulyatorun miqyas baxımından bəzi məhdudiyyətləri olsa da, kiçik modellərdən əldə edilən nəticələrin böyük strukturlar üçün rəhbər olacağı gözlənilir. Nəticələri dizaynerlərə bildiriləcək bu sınaqlar sayəsində gələcəkdə bütün dünyada daha təhlükəsiz 3D çaplı mənzil layihələrinin həyata keçirilməsi hədəflənir.
