Son dövrlərdə Tesla brendi yenilənmiş Model 3 elektromobili ilə gündəmdədir. Belə ki, daha müasir və aqressiv görünüşlü bu elektromobil artıq qlobal bazarda da diqqət çəkib. Lakin bu dəfə biz Tesla brendinin şotlandiyalı müştərisinə verdiyi cavab barədə danışacağıq. Belə ki, şotlandiyalı Tesla Model Y istifadəçisi elektromobilin yağış səbəbi ilə xarab olmasını şirkətə bildirsə də, zəmanət şərtlərinə aid olmadığı üçün elektromobilini təmir etdirə bilməyib. Yəni, Tesla yağışlı havada batareyaya su daxil olduğu üçün xarab olan Model Y-i zəmanət altında təmir etməkdən imtina etdi.
Görünən odur ki, yağışda xarab olan elektromobilinizi Tesla zəmanət çərçivəsində təmir etməyəcək. Hətta bunun müqabilində elektromobilinizi təmir edə bilmək üçün sizdən yüksək məbləğ tələb olunacaq. Şotlandiyanın paytaxtı Edinburq şəhərində yaşayan bu Model Y istifadəçisi yağış nəticəsində zədələnmiş elektromobilinin batareyasını dəyişdirə bilmək üçün şirkətə müraciət edib. Nəticədə isə şirkət müştəridən 17374 funt sterlinq və ya 21200 dollar tələb edib.
Hər şey avtomobil sahibinin dostu ilə yağışlı gündə restorana getməsi ilə başlayıb. Nahardan sonra onlar Tesla Model Y-nin işləmədiyini gördülər. Daha sonra Tesla yardım xidməti vasitəsilə çağırılan evakuator elektromobili servis mərkəzinə aparıb. Conni Baciqalupo bunun üçün 5 saat gözləməli olub. Ertəsi gün Model Y sahibinə məlumat verilib ki, batareya suya məruz qaldığı üçün zədələnib və təəccüblüsü budur ki, batareya 8 illik zəmanətin şərtlərinə daxil olmayıb. Con baş verənlərin onun günahı olmadığını israr etsə də, Tesla nümayəndələri batareyanın suya qərq olduğunu və zəmanət altında onu təmir etməyin mümkün olmadığını təkrar ediblər. Görünən odur ki, elektromobilinizi yağışdan qorumasaz təmir olunması üçün elektromobilin yarı qiymətində servis haqqı ödəyəcəksiniz.
