Xiaomi brendinin maraqla gözlənilən elektrikli SU7 modelinin interyer görüntüləri ortaya çıxıb. Belə ki, Sürücü yönümlü dizayn təklif edən Xiaomi, ən son modaya əməl etmədən fiziki açarlar əlavə etdi. Bildiyimiz kimi, son dövrlərdə bir çox çinli elektromobil istehsalçıları avtomobilin interyerində demək olar ki, heçbir fiziki düymədən istifadə etmirdi. Xiaomi isə indi sadəliyə daha çox önəm verdiyini nümayiş etdirib. Qeyd edək ki, ötən aylarda yəni dekabr ayında avtomobilin eksteryeri də bizə məlum olmuşdu.
Xiaomi SU7 modelinin yeni rəsmi interyer görüntülərinə görə, Xiaomi avtomobil sahəsinə girən texnologiya şirkətlərinin üstünlük verdiyi minimalist interyerdən uzaqlaşır. Yüksək texnologiya ilə yanaşı, şirkət fiziki düymələri olan sürücü mərkəzli dizaynı qəbul edib. SU7-nin interyerinə nəzər saldıqda onun yumru deyil, daha çox aşağı tərəfdə sükanının düz olduğunu görə bilərik. Habelə interyerdə elektromobilin haptik əks əlaqəyə malik düymələrə, ortada üfüqi şəkildə yerləşdirilmiş sensor ekrana və bəzi funksiyalara çıxışı təmin edən mərkəzi konsolda fiziki düymələrə malik olduğunu görürük. Bu fiziki düymələr ilə kondisioner, sürüş hündürlüyü və arxa qanad spoyleri kimi əsas funksiyaları idarə etmək olar.
İnteryerdə həmçinin baş üstü displey, alət paneli və hava ventilyatorlarını birləşdirən sürüşgən alət paneli dizaynı var. Ortadakı məlumat-əyləncə ekranının altına daha çox fiziki düymələr əlavə etməyə imkan verən slot girişi də var. Yeni elektromobilində idman oturacaqlarına üstünlük verən Xiaomi daha çox rahatlığa da önəm verib. 2024-cü ilin ilk yarısında tədarüklərə başlayacağını bildirən Xiaomi yeni elektromobilini 42 min dollardan başlayan qiymətlə satışa çıxaracaq.
