Avtomobil sənayesi sahəsində köklü təcrübəyə sahib olan Toyota brendi daim yeniliklərə açıq olub. Belə ki, Yaponiyanın, o cümlədən dünyanın avtomobil nəhənglərindən biri olan Toyota avtomobil dizaynında süni intellektdən istifadə edir. Yapon avtomobil brendi süni intellekt texnologiyalarına xəyal etdikləri dizaynı mətn formasında təqdim edirlər. Süni intellekt isə mətndəki əmrləri başa düşərək yeni dizaynlar yaradır. Daha sonra isə bu sadə dizayn Toyota dizaynerləri tərəfindən daha da təkmiləşdirilir. Yekunda isə möhtəşəm və xüsusi nəticələr ortaya çıxır. Hətta bununla bağlı şirkət qısa video da yayımlayıb.
Toyota brendi artıq tamamilə həyatımızın bir hissəsinə çevrilmiş süni intellektdən istifadə edərək avtomobil modellərinin aerodinamikasını təkmilləşdirməyi planlayır. Bundan əlavə avtomobil nəhəngi yeni modellərində daha fərqli və daha xüsusi dizaynlardan istifadə etmək, onları sınamaq istəyir. Bu məqsədlər üçün də təbii ki, süni intellekt yaponiyalı brendin imdadına yetişir. Xatırladaq ki, Audi brendi təkər dizaynında süni intellekt texnologiyalarında istifadə edir. Toyota brendinini istifadə etdiyi süni intellekt isə hələlik avtomobili tam səviyyədə inkişaf etdirmək və ya prosesin bütün mürəkkəb mühəndisliyini idarə etmək səviyyəsində deyil. Hələlik süni intellekt sadəcə dizayn prosesinin ilkin mərhələsində köməklik edir.
Əslində bir çox avtomobil brendi müasir dövrdə süni intellekt texnologiyalarında istifadə edir. Onların bəziləri bunu açıqlasa da bəziləri gizli saxlamaq istəyir. Lakin ümumi olaraq onların istifadə etdiyi süni intellekt alətləri eyni prinsipdə fəaliyyət göstərir. Yəni süni intellekt ilkin ideanı verir, daha sonra dizaynerlər onu təkmilləşdirir. Gələcəkdə isə süni intellekt dizaynerləri belə işsiz qoya bilər.
