Keçən ayın sonunda Tesla Texas ştatının Ostin şəhərində sürücüsüz taksi xidmətinə başlayacağını açıqlamışdı. O vaxtdan bəri şirkətin robot-taksi manevrləri və yol hərəkəti qaydalarını pozması ilə bağlı xəbərlər üzə çıxıb və indi ilk qəza gəlib. Belə ki, ötən ay istifadəyə verilən Tesla robot taksisi ilk dəfə qəza edərək Toyota Camry modelinə çırpılıb.
İnsident “Home Slice Pizza” restoranının izdihamlı dayanacağında baş verib, bunu Dirty Tesla YouTube kanalındakı video da təsdiqləyib. Tesla Model Y elektrik avtomobili dayanacaqdan çıxmaq istəyərkən park edilmiş Toyota Camry-yə çırpılıb. Sərnişin robo-taksidən çıxandan sonra Model Y elektrik avtomobili restoranın dayanacağından çıxmağa başlayıb. Daha sonra avtomobil dayandı, bir neçə saniyə sonra qəfildən uzaqlaşaraq sola dönüb və yanında dayanmış Toyota Camry-yə çırpılıb. Avtomobilə cüzi ziyan dəysə də, xəsarət alan olmayıb.
Tesla elektrik avtomobilinin bu irrasional manevrinin səbəbi aydın deyil. Bununla belə, şirkətin robot-taksisinin qarşıdan gələn zolağa keçməsi və bir neçə saniyə həmin zolaqda qalması ilə bağlı daha əvvəl internetdə məlumatlar yayılmışdı. Mövcud məlumatlara görə, ABŞ Milli Avtomobil Yolları Hərəkətinin Təhlükəsizliyi İdarəsi (NHTSA) Tesla-nın robot-taksi xidmətinin fəaliyyətini şirkətin avtonom elektriklə işləyən avtomobillərinin yol hərəkəti qanunlarını pozan onlayn video görüntüləri əsasında araşdırır. “Bu hesabatları və əlaqəli məlumatları nəzərdən keçirdikdən sonra NHTSA yol hərəkətinin təhlükəsizliyini təmin etmək üçün bütün lazımi tədbirləri görəcək”, – məlumatda belə qeyd edilir.
