Bildiyimiz kimi, Tesla brendi ötən aylarda yeni Cybertruck modelini təqdim edərək satışa çıxarmışdı. Tesla modelləri arasında ən bahalı elektromobil olaraq bilinən Cybertruck özünəməxsus dizaynı və dözümlülüyü ilə diqqət çəkməyi bacarmışdı. Lakin performans tərəfində eyni ifadəni işlətmək düzgün olmazdı. Çünki, Tesla brendinə məxsus Cybertruck modelinin mənzil göstəriciləri bir çox istifadəçini məyus edir. Belə ki, 10 min mil və ya 16 min km məsafə qət edən iki Cybertruck istifadəçisi qarşlaşdıqları problemləri şərh edib.
Əslində istehsalçının vəd etdiyi mənzil göstəricilərinin real mənzil göstəricisindən fərqli olması çox qarşılaşdığımız haldır. Bununla belə, bu hadisə 80 min dollarlıq Cybertruck istifadəçiləri üçün həqiqətən də məyusedici hesab oluna bilər. Tesla brendi dörd təkərli Cybertruck modelinin 547 km mənzil, CyberBeast modelinin isə 515 km mənzil göstəricilərinə sahib olduğunu bildirmişdi. Habelə 2025-ci ildə istehsalı başlayacaq ən uyğun qiymətli arxa ötürücülü model tək şarj ilə 402 km məsafə qət etməyə imkan verir.
Reallıq isə Tesla brendinin qeyd etdiyi göstəricilərdən olduqca fərqlidir. Belə ki, yeni elektromobil ilə 16 min km qət edən iki istifadəçi bütün detallar paylaşaraq bildiriblər ki, reallıq məyusedicidir. İstifadəçilərə görə elektrikli pikap real şəraitdə sadəcə 332 km məsafə qət edə bilir. Bundan əlavə elektromobil 80% şarj ilə sadəcə 264 km məsafə qət etmək qabiliyyətinə malikdir. Gördüyümüz kimi, Tesla brendinin bildirdiyi rəqəmlər ilə real rəqəmlər olduqca fərqlidir. Təbii ki, mənzilə təsir edən bir çox amil mövcuddur, lakin bu qədər fərqin meydana gəlməsi həqiqətən də diqqət cəlb edir.
