Çinin avtomobil istehsalçısı Geely Auto, olduqca qüvvətlən elektromobil və hibrid avtomobillər bazarında rəqabətə davam etmək üçün premium səviyyəli avtomobillərini təqdim etdi. Belə ki, Geely Auto şirkəti Galaxy adlı yeni seriyası altında iki il ərzində yeddi şarj oluna bilən hibrid və elektrik modelini təqdim edəcəyini, onlardan üçünün bu il bazara çıxacağını söyləyib. Bir detal da var ki, şirkətin yeni seriyasındakı modellər Geely Auto ana şirkəti Geely Holding qrupunun premium brendi olan Zeekr ilə eyni yox, 1 pillə daha aşağı mövqedə qiymətləndirilirlər. Digər vacib detal isə Geely Galaxy seriyasının birbaşa Geely şirkətinin özünü təmsil edəcəyidir. Bunu bir növ smartfonlardakı BBK qrupu prinsipinə bənzədə bilərsiniz. Necə ki, OPPO şirkəti öz smartfonlarından əlavə OnePlus, Realme kimi alt brendləri ilə işləyib eyni zamanda öz smartfonlarını da bazara çıxarır, Galaxy xətti də məhz buna bənzər olacaq.
Şirkət keçirdiyi tədbirdə bizlərin qarşısına 2 yeni modelini, batareya təhlükəsizliyi sistemini, hibrid güc sistemini və Galaxy N-OS adlı ağıllı avtomobil əməliyyat sistemini, yəni ümumilikdə qabaqcıl elektrikləşdirilmiş texnologiyalar təqdim etdi. Yeni əməliyyat sistemi Smart Geely 2025 strategiyasına uyğun olaraq işlənərək hazırlanıb. Şirkət brendin gələcəyini təmin etmək üçün maşən öyrənməsi ilə özünü inkişaf etdirən alqoritmlərə, əməliyyat sistemlərinə, ağıllı bulud hesablamalarına, çiplərə və peyk şəbəkələrinə ciddi yatırımlar edir.
Başlayaq elə, şəkildə gördüyünüz şarj edilə bilən hibrid model Geely Galaxy L7 modelindən bəhs edək. Bu avtomobil əslində, tam olaraq effektivlik nəzərən hazırlanmış hibrid avtomobildir. Dizaynı ilə olduqca modern görünən Geely Galaxy L7 modeli 100 km məsafədə 5,23L yanacaq sərf edərək ortalama 1370 km məsafə qət edə biləcək. Performans baxımından isə heç də zəif olmayıb, olduqca güclü elektrik mühərriklərinin və 1.5 litrlik turbo gücləndirməli mühərrikinin dəstəyi ilə 6.9 saniyədə 100 km/s sürət toplamağı bacaracaq. Ümumilikdə 664 at gücü hasil edəcək.
Şarj oluna bilən bu SUV eyni zamanda Snapdragon 8155 platformasına əsaslanan Galaxy N əməliyyat sistemi ilə gücləndiriləcək. Sistemin performansı o qədər təkmilləşdirilib ki, Geely şirkəti elektromobilin sadəcə 0,5 saniyədə bütün proseslərə tam hazır vəziyyətə gələ bildiyini açıqlayır.
Avtomobilin interyerində isə Çinlilərə görə müasirlik hesab edilən boydan-boya ekranları görülür. Doğrusu, Mercedes-Benz şirkəti belə artıq boydan-boya ekran ənənəsinə keçid etdiyindən deyəcək çox bir şey yoxdur. Lakin nə olursa olsun, gözə xoş təəssürat yaratmaqdadır.
Digər bir diqqət çəkən model isə Galaxy Light adı verilən konsept oldu. Əslində Galaxy E8 modeli olacaq bu konsept yaxın vaxtlarda seriya istehsalına uyğunlaşdırılmış şəkildə qarşımıza çıxmalıdır. Lakin hələlik bununla bağlı dəqiq bir informasiya yoxdur. Dizayn isə olduqca minimalist alınıb. Geely elektromobili o qədər yastı dizayn edib ki, sürtünmə əmaslı sadəcə 0.19 olaraq qeyd olunub.
Galaxy avtomobillərində ağıllı sürücülük funksiyaları və yüksək dəqiqlikli avtopilot və.s ön planda olsa da Volvo ruhu da hiss olunur. Xüsusilə, təhlükəsizlik cəhətdən. Xüsusi proqram təminatı qısa-qapanma, qəza, zədə və anomal isinmə zamanı gücü anidən kəsə bilər. Hər bir batareya hüceyrəsi əlavə yüklənmə zamanı isindikdə proqram təminatı tərəfindən həmin hüceyrəyə yüklənmə miqdarı real zamanlı azaldıla bilər. Bu xüsusiyyət ilə termal vəziyyət maksimum dərəcədə optimallaşdırılaraq, batareya ömrü 20%-ə qədər uzadılacaq deyə şirkət tərəfindən bildirilir.
Avtomobil istehsalçısı bildirib ki, 2025-ci ilə qədər Geely Holding Group Galaxy modelləri üçün qlobal əhatəni təmin edən 72 peykdən ibarət şəbəkəyə sahib olacaq. Geely Auto 2022-ci ildə 1,43 milyon avtomobil satıb ki, bu da illik müqayisədə 8% artım deməkdir. Onlardan NEV satışları təxminən 300.000 ədəd təşkil edib. Avtomobil istehsalçısı bu il ümumi satışlarının 1,65 milyon ədədə qədər artacağını gözləyir.
