Keçən ilin dekabrında ABŞ Senatı bütün federal işçilər üçün TikTok-u hökumət cihazlarından çıxarmağı məcbur etdi. Bu qərara oxşar, lakin daha əhatəli qərar bu dəfə Avropa Birliyinin iki ən mühüm orqanı tərəfindən qəbul edildi. Belə ki, Avropa Birliyi təhlükəsizlik səbəbi ilə TikTok-u işçilər arasında qadağan edib. Brüsseldə keçirdiyi mətbuat konfransında bu addımı elan edən Breton, Komissiyanın TikTok ilə bağlı hər hansı insidentə məruz qalıb-qalmadığını deməkdən isə imtina edib.
Çin ByteDance şirkətinə məxsus məşhur sosial media proqramı olan TikTok haqqında narahatlıqlar artmağa davam edir. Çindəki qanuni tənzimləmələrə görə Çin hökumətinin ölkədəki şirkətə böyük təzyiqi var. TikTok-un Çinlə həssas istifadəçi məlumatlarını paylaşdığı iddia edilir. Digər tərəfdən Avropa Birliyi qurumları artan narahatlıqlar fonunda təhlükəsizliklə bağlı TikTok-u işçilər arasında qadağan edib.
Avropa Parlamenti Komissiyanın hərəkətindən xəbərdar olduğunu və onunla əlaqə saxladığını bildirib. Qəbul etdikləri qərar çərçivəsində Avropa Komissiyası və Avropa Şurası işçilərdən TikTok-u həm korporativ cihazlarından, həm də şəxsi cihazlarından çıxarmağı xahiş etdi. “Bu tədbir Komissiyanı kibertəhlükəsizlik təhdidlərindən və Komissiyanın institusional mühitinə qarşı kiberhücumlarda istifadə oluna biləcək hərəkətlərdən qorumaq məqsədi daşıyır”, – deyə Komissiyanın sözçüsü Sonya Qospodinova bildirib. Həmçinin bildirilib ki, işçilər martın 15-dək TikTok-u cihazlarından silməlidirlər. Komissiya, digər sosial media platformalarında təhlükəsizlik inkişaflarının da daim nəzarətdə saxlanılacağını qeyd edib.
TikTok isə qərardan əvvəl Komissiyanın və səlahiyyətlilərin onlarla əlaqə saxlamaması səbəbilə məyus olduqlarını və təəccübləndiklərini bildirib. Reuters resursuna danışan TikTok sözçüsü, Avropa Birliyi ilə əlaqə saxlayaraq istifadəçi məlumatlarını necə qoruduqlarını izah edəcəklərini deyib. TikTok, qərarın yanlış istiqamətləndirmə və anlayışa görə olduğuna inandıqlarını bildirdi. Digər tərəfdən, tətbiq istifadəçi məlumatlarını Çin səlahiyyətliləri ilə paylaşmadığını bir daha vurğuladı.
