Geely Coolray krossoveri, yəni Çindəki adı ilə desək Binyue Cool, 2018-ci ildə bazara təqdim olunduqdan sonra ilk dəfə böyük bir yeniləmədən keçirilib. Ümumiyyətlə, model Geely-nin keçən ildən istifadə etdiyi Energy Storm (“enerji fırtınası”) adlı dizayn üslubunda hazırlanıb. Lakin avtomobilin eksteryerində, xüsusilə də ön tərəfində ciddi dəyişikliklər mövcuddur. Belə ki, Avtomobilin ön tərəfində gənclərin istədiyi sərt idman üslublu yeni dizayn çox möhtəşəm görünür.
Yeni Geely Coolray-da fərqli dizaynlı 18 düymlük təkər diskləri peyda olub. Ön tərəfdə radiator barmaqlığı xeyli böyüyərək adətən bamperi yoxa çıxarıb. Eyni zamanda ön fənərlər də tamamilə yenidən hazırlanıb. Avtomobilin yan və arxa tərəflərində də müəyyən dəyişikliklər hiss olunur. Elə arxa tərəfdən ən çox diqqət çəkən cəhət əyləc işıqlarının ortadan birləşdirilərək GEELY yazısının baqaj qapağı üzərinə yer dəyişməsidir.
Salon demək olar ki, tamamilə sıfırdan yaradılıb. İndi ön paneldə 10,25 və 12,3 düym diaqonallı iki ekran istifadə olunur. Bu konfiqurasiya müasir Mercedes-Benz avtomobillərini xatırladır. Düşünürük ki, daha innovativ görünsə də öz sələfində daha idman üslublu ön panel var idi. Hava kanallarının forması da həmçinin dəyişib. Mərkəzdə smartfonlarınız üçün simsiz enerji doldurulması üçün yuva quraşdırılıb. Qapı üzərində tutacaqlardan tutmuş işləmələrə qədər hər şey fərqli şəkildə hazırlanıb. Geely Coolray modelində oturacaqlar da yenidən işlənib. Sürücünün rahatlığını müəyyən edən şəxsi oturacaq parametrlərini, güzgü sazlamalarını və digər şeyləri analiz edən Face ID üz tanıma sistemi əlavə edilib.
Geely Coolray modelinə Aurobay (Zhejiang Geely Holding Group və Volvo-ya məxsusdur) tərəfindən hazırlanmış yeni BHE15 dörd silindrli mühərrik təchiz edilir. Yeni mühərrik restaylinqdən əvvəl Coolray-da quraşdırılmış turbo mühərrik ilə eyni həcmə malikdir. Kapotun altında 1.5 litrlik 181 at gücünə malik yeni dörd silindrli mühərrik mövcuddur. 290 Nm fırlanma anı hasil edə bilir. Avtomobil istehsalçısının sözlərinə görə, yerindən saatda 100 kilometrə 7,6 saniyə sürətlənir. Yanacaq sərfiyyatı isə 100 kilometrə 6 litrdən azdır. Nəticədə Geely Coolray həm daha sürətli, həm daha qənaətcil olub. Siz bu avtomobil haqqında nə fikirləşirsiniz? Fikirlərinizi bizimlə bölüşməyi unutmayın!
