Microsoft, süni intellekti noutbuklara inteqrasiya etmək üçün “Copilot Plus PC” brendini elan edib. Bu marka altında buraxılan noutbuklar daxili süni intellekt aparatına və müəyyən funksiyalara malik olacaq. Beləliklə, Microsoft süni intellekt əsaslı noutbuk nəhəngi olmaq üçün daha bir qətiyyətli addım atıb.
Microsoft-un baş ofisində keçirilən tədbirdə Microsoft-un baş direktoru Satya Nadella bildirib ki, Microsoft-un bütün əsas noutbuk partnyorları Copilot Plus fərdi kompüterləri təklif edəcəklər. Microsoft həmçinin Surface sırasına Snapdragon X prosessorlu iki noutbuk əlavə edib. Nadella, Intel və AMD prosessorlu noutbukların da bu süni intellekt xüsusiyyətlərini təqdim edəcəyini bildirib. Süni intellekt imkanları noutbuklarda olan neyron emal qurğuları sayəsində mümkün olacaq. Şirkət həmçinin kompüterinizdə etdiyiniz və gördüyünüz hər şeyin axtarış edilə bilən foto yaddaşını yaradan “Recall” adlı yeni funksiya təqdim edəcək.
Noutbuklar bu yeni xüsusiyyətləri dəstəkləmək üçün Windows 11-in bir hissəsi kimi 40-dan çox süni intellekt modelini işlədəcək. Microsoft-un daxili süni intellekt köməkçisi Copilot da OpenAI-nin keçən həftə təqdim etdiyi GPT-4o modelini dəstəkləyəcək. Copilot Plus kompüterləri Microsoftun vəd etdiyi performansı təmin etmək üçün müəyyən tələblərə cavab verməlidir. Bu tələblər; ən azı 16 GB RAM və 256 GB SSD və inteqrasiya olunmuş neyron emal qurğusudur. Microsoft bu cihazları Windows noutbuklarında yeni dövrün başlanğıcı kimi təqdim edir.
