HMD Global əfsanəvi Nokia smartfonlarını yenidən aramıza qaytarmağa davam edir. Belə ki, bu dəfə HMD Global şirkəti əfsanəvi Nokia Lumia 920 dizaynlı smartfon hazırlayır. Qeyd edək ki, HMD Global, Nolkia markalı cihazların istehsal lisenziyasına sahibdir. Şirkət indi ekran çərçivəsi və kamera modulu da daxil olmaqla bir neçə fərqliliyi ilə məşhur olan əfsanəvi cihazı həyata qaytarmağı planlaşdırır.
Hindistanlı blogger Mukul Sharma iddia edir ki, yeni smartfonun yuxarı və aşağı kənarları düz olacaq və bu, düşmələrə qarşı daha çox müqavimət göstərməsinə imkan verəcək. Bloqqerin sözlərinə görə, cihazın yeniliyi 32MP selfie kamerası, PureView loqolu 108MP əsas və 2 meqapiksellik kamera sensorlarına sahib olmasıdır. Həmçinin, smartfonun 2,4 GHz tezliyində işləyən dörd performanslı Arm Cortex-A78 nüvəsi və 1,95 tezliyində işləyən dörd enerjiyə qənaət edən Arm Cortex-A55 nüvəsini özündə birləşdirən 4 nanometrlik texnologiyadan istifadə etməklə istehsal olunan Qualcomm Snapdragon 7s Gen 2 prosessoru üzərində qurulacağı məlum olub.
Smartfonun texniki xüsusiyyətlərinə 33 Vt sürətli enerji doldurma qabiliyyətinə malik 4900 mAh batareya və Full HD+ təsvir ölçüsünə və 120 Hz təzələnmə tezliyinə malik AMOLED ekran daxildir. Prosessordan danışsaq, bu yaxınlarda Geekbench platformasında görünən HMD Tomcat smartfonundan bəhs edə bilərik. Yeni cihaz məhz Tomcat smartfonunun performansına sahib olacaq. Hələlik, yeni Lumia cihazının təqdim ediləcəyi tarix və qiyməti məlum deyil.
