Almaniya və dünyanın ən böyük avtomobil istehsalçılarından biri BMW emissiya saxtakarlığına görə araşdırmaya alınıb. Almaniyanın federal nəqliyyat orqanı Kraftfahrt-Bundesamt (KBA), BMW-nin dizel işlənmiş qazı, yəni emissiya dəyərlərində şübhəli hallar aşkar edib.
Beləliklə, şirkətin manipulyasiya etdiyinə dair iddialarla bağlı araşdırma başlandığı açıqlanıb. Agentlik iddia edir ki, avtomobil istehsalçısı laboratoriya şəraitində sertifikatlaşdırma və emissiya sınaqları zamanı bəzi modellər üçün reallıqdan xeyli aşağı işlənmiş qaz emissiyalarına nail olmaq üçün xüsusi cihazdan istifadə edir.
Məhz bu istiqamətdə ciddi araşdırma başladılıb və bütün bu iddiaları BMW qəbul etmir. Lakin qəti danışmaqdan əvvəl rəsmi araşdırmanın nəticəsini gözləmək lazımdır. Təkrar qeyd edək ki, bu iddiaların mərkəzində köhnə nəsil 2.0 litrelik turbo dizel mühərrikinə sahib BMW modelləri dayanır. Emissiya qalmaqalı ilə bağlı Volkswagen də problemlər yaşamışdı. 2015-ci ildə yanlış işləyən proqram təminatı ilə bütün dünyanın gündəmində olan Almaniya əsilli istehsalçı 5 il sonra milyardlarla dollara çatan cərimələrlə üzləşmişdi. Ona görə də emissiya dəyərləri ilə bağlı şübhəli hallar təsdiqləndiyi vəziyyətdə şirkətlər arzulamadıqları nəticələrə boyun əymək məcburiyyətində qalırlar.
