Son vaxtlar müxtəlif cihazların partlaması ilə əlaqədar hallar tez-tez qarşımıza çıxır. Məsələn, sentyabr ayı bir Samsung Galaxy Watch istifadəçisi öz ağıllı saatının həddindən artıq isinməsi səbəbilə qolunda yanığa səbəb olduğunu bildirmişdi. Həmin xəbərin ortaya çıxmasından sonra bir çox istifadəçi eyni halla bağlı paylaşımlar etmişdi. İndi isə bir Apple Watch istifadəçisi Apple Watch Series 7 ağıllı saatında bənzər bir problem yaşayıb. Həddindən artıq isinən Apple Watch partlayıb. Lakin bu dəfə baş verən fakt əvvəlkilərdən xeyli fərqlənir. Çünki, verilmiş məlumata görə Apple şirkəti istifadəçidən bu halı ictimailəşdirməməyi, heç kimlə paylaşmamağı, hətta xüsusi sənədə imza ataraq səssiz qalmasını tələb edib.
Partlayan Apple Watch və verilmiş bu məlumatlarla bağlı Apple şirkəti heç bir açıqlama verməyib
9to5Mac resursu tərəfindən paylaşılan detallara əsasən, Apple Watch istifadəçisi saat partlamamışdan bir gün əvvəl Apple dəstək xidməti ilə əlaqəyə keçib. Səbəb isə ağıllı saatın həddindən artıq isinməsi olub. Saat istifadəçinin qolunda taxılı vəziyyətdə çox isinib və bir müddət sonra yüksək temperatur xəbərdarlığı verib. İstifadəçi isə Apple dəstək xidmətinə yaşadığı problemi çatdırıb. Lakin Apple dəstək xidməti yaşanmış problemlə bağlı heç bir həll yolu göstərilməyib. İstifadəçiyə isə Apple servislərindən sakticə xəbər gözləmək və saata toxunmamaq tapşırılıb.
Növbəti gün yuxudan oyanan istifadəçi saatın inanılmaz dərəcədə isindiyini və ekranının istidən yararsız vəziyyətə gəldiyini görüb. Apple dəstək xidmətinə göstərmək üçün şəkillərini çəkmək istəyərkən Apple Watch Series 7 olduğu qeyd edilən ağıllı saat partlayıb. Problem bundan sonra daha da böyüyüb. Apple, saatın yoxlanılması üçün laboratoriyaya göndərilməsinə qərar verib. İstifadəçidən bu hadisəni heç kimlə paylaşmaması barədə sənəd imzalamaq tələb edilib. İstifadəçi isə sənəd imzalamağı rədd edib və olanları 9to5Mac resursu ilə bölüşüb. Apple istifadəçiyə növbəti bazar ertəsinə qədər mövzu ilə bağlı məlumat verəcəyini bildirsə də faktla bağlı indiyə qədər heç bir cavab göndərməyib.
