Elektromobil sektorunda bazarda lider olan Tesla şirkəti bəzilərinə görə xeyli məntiqli, digər bir tərəfdən də bir o qədər məntiqsiz görünən bir addım atıb. Belə ki, bundan təqribi 17 ay əvvəl elektromobillərdən radar sistemlərinin yığışdırılacağı Tesla tərəfindən bildirilmişdi. Tesla bu il Model 3 və Model Y üçün müvafiq sadələşdirmə hədəfini həyata keçirir və ultrasəs sensorlarını yığışdırır.
Başlanğıcda, Tesla avtopilot sistemi səkkiz kamera, ön radar və bir neçə ultrasəs sensorları ilə hərəkəti təmin edirdi. Lakin Tesla Vision mərhələsinə keçiddən sonra həm kameralardan, həm də radarlardan gələn məlumatlar əvəzinə, yalnız kamera əsaslı avtopilot sistemindən istifadə ediləcək. Tesla şirkəti artıq Tesla Vision üçün bir addım daha irəli getdiklərini və ultrasəs sensorlarını çıxardığını elan edir. Ötən ildən etibarən radar sistemlərini də tamamilə ləğv edən şirkət bundan sonra yoluna yalnız kameralar hesabına davam edəcək.
Beləliklə, elektromobillər yalnız kameralar ilə hərəkət edib “Tesla Vision” mərhələsinə keçid edəcəklər
Hal-hazırda istehsal edilən yeni Tesla Model 3 və Model Y elektromobillərində ultrasəs sensorların quraşdırılması dayandırılır deyə, bəzi Avtopilot funksiyaları yeniləmə gələnə qədər bu elektromobillərdə deaktiv ediləcək. Yəni ultrasəs sensoru olmadan istehsal edilən modellər avtomatik park etmə, avtomatik park yerindən çıxıb yanınıza gəlmə tipli xüsusiyyətləri işlədə bilməyəcək. Lakin qısa vaxt ərzində ultrasəs sensoru olmayan yeni istehsal edilmiş elektromobillərdə də köhnə modellər (ultrasəs sensoru olan) kimi xüsusiyyət aktiv ediləcək.
Ardıyca 2023-cü ildə Tesla Model X və Model S modellərində də ultrasəs sensorları ləğv ediləcək. Qeyd edək ki, ultrasəs sensorları çoxlarınızın avtomobilindəki yaxın məsafədən obyektə olan məsafənin ölçülməsində işlədilir. Uzaq məsafələrin ölçülməsinə yarayan və ötən il ləğv edilmiş radar texnologiyası əslində, bundan daha əhəmiyyətli idi.
Tesla şirkəti bildirir ki, bu addım xərcləri azaltmaq üçün həyata keçirilmir. Kameralar və süni intellekt avtomobillərin avtonom idarəsində daha yaxşı nəticələr ortaya qoyur. Lakin bu tip sensorlar proqram təminatında müəyyən xətalara səbəb olur, qeyri-effektiv təsirə göstərir. Ona görə avtopilot sisteminin yalnız kameralar ilə ölçmələr etməsini təkmilləşdirmək üçün sensorların ləğvi həyata keçirilir.
Sürücülərin və bizim şəxsi fikrimiz isə atılmış bu addımın o qədər də yaxşı nəticə verməyəcəyi yönündədir. Çünki, kameralar ilə aparılan ölçmələr nə qədər mükəmməl olsa da fiziki sensor ilə uzaqlıq daha düzgün təyin oluna bilir. Digər bir tərəfdən hava qaranlıq olduqda, kameralar çirkləndikdə və ya görüntünün hansısa yanıldıcı maneə ilə düzgün hesablanmadığı hallarda xəta ehtimalı xeyli artır. Ümid edirik ki, şirkət Tesla Vision hədəfində uğurlu olacaq, amma bu mövzuda öz fikirlərinizi də rəylərdə bölüşməyi unutmayın.
