Bildiyimiz kimi bir neçə gün sonra Apple şirkəti yeni iPhone 14 xəttini təqdim edəcək. Hətta bir neçə saat əvvəl iPhone SE 2022 modeli barədə sizə məlumat vermişdik. İndi isə məşhur analitik Ming-Chi Kuo tərəfindən maraqlı bir xəbər paylaşılıb. Belə ki, Amerika şirkəti iPhone 14 modelinin kütləvi istehsalından öncə, peyk bağlantı funksiyası uğurla sınaqdan keçirib. Həmçinin bütün lazımı işlər tamamlanıb.
Analitik təsdiqləyib ki, yeni iPhone 14 seriyası modellərdə peyk bağlantısı funksiyası cihaz səviyyəsində dəstəklənəcək. Yeni iPhone modellərinin peyk bağlantısı ilə işləyə bilməsi mobil operator şirkətlərinə bağlı olacaq. Təbii ki, bu xüsusiyyət ilk öncə ABŞ ərazisində dəstəklənməlidir. Qeyd edək ki, iPhone 13 seriyasında da həmçinin peyk bağlantısı dəstəklənirdi. Lakin mobil operatorlar ilə razılaşmaya gələ bilmədikləri üçün istifadəsi mümkün olmayıb.
iPhone 14 ilə Apple peyk bağlantısının istifadəsini mümkün edəcək?
Analitikin sözlərinə əsasən, Apple iPhone modellərində peyk bağlantısı dəstəklənsə də istifadəyə verilmə tarixi hələ ki, açıqlanmayacaq. Şirkət bunun üçün infrastrukturda hər şeyi hazırladığı üçün, xüsusiyyət yaxın gələcəkdə aktiv ediləcək. İlkin mərhələdə peyk bağlantısı təcili yardım zəngləri və fövqalədə SMS-lər üçün istifadə olunacaq. Bloomberg resursundan Mark Gurman da qeyd edib ki, iPhone istifadəçiləri peyk bağlantısından istifadə edə biləcəklər. Bu mobil rabitə şəbəkəsinin olmadığı ərazilərdə və yalnız fövqəladə hallarda mümkün olacaq. Həmçinin mətn mesajları da göndərə biləcəyi təsdiqlənib.
Bəzi iddialara görə isə, Apple şirkəti Globalstar ilə bu istiqamətdə birgə çalışıb. Apple və Globastar, iPhone 14 seriyası təqdimatında peyk bağlantı funksiyasını yaxınlarda istifadəyə veriləcəyini açıqlaya bilər. Ötən həftə T-Mobile və SpaceX şirkətləri yeni planları haqqında açıqlama vermişdilər. Belə ki, “Peyk – mobil şəbəkə” xidməti ilə ABŞ ərazisinin istənilən nöqtəsində 5G şəbəkəsi təmin olunacaqdı. Göründüyü kimi yaxın illərdə smartfonlar və digər ağıllı cihazların bir hissəsi mobil şəbəkə əvəzinə peyk bağlantısı ilə çalışa bilər.
