Bu ilin yaz aylarında təqdim edilmiş iPhone SE 2022 modelini xatırlayırsınızsa, iPhone 8 modeli ilə bənzər dizayn və yeni nəsil Apple A15 Bionic çipsetini almışdı. iPhone 14 seriyasının təqdimatından əvvəl tanınmış insayder Jon Prosser indidən iPhone SE (2023) modelinin hazırlıqda olduğu və bəzi texniki detalları barədə məlumatlar bölüşüb. Əslində insayderin dedikləri əvvəlcədən bizə az-çox məlum idi. Lakin Jon Prosser daha əvvəl sızan məlumatları təsdiqləyən bəzi yeni detallar bölüşüb.
Yeni iPhone SE (2023) modeli köhnə çipset, lakin “yeni” gövdə alacaq
Bu gün gecə Tayvan mediası tərəfindən Apple şirkətinin yeni cihazlarındakı çipset və prosessorların kod adları paylaşıldı. Nəticədə iPhone 14 Pro (Max) modellərində dördüncü nəsil 5nm TSMC texnoloji prosesini əldə etmiş A16 Bionic çipsetinin quraşdırıldığı, Pro olmayan modellərdə isə A15 Bionic çipsetinin olduğu bir daha təsdiqləndi. Normal iPhone 14 modellərində A16 Bionic çipseti olmadığını bildiyimiz üçün, iPhone SE (2023) modelində də bu çipsetin mövcud olmayacağı dəqiqdir.
İnsayderin iddialarına görə də iPhone SE 4 olaraq xarakterizə edilən model iPhone Xr modelinin gövdəsini alacaq. Nəticədə nisbətən böyüyən cihaz daha geniş ekrana malik olacaq. A15 Bionic çipsetinin yeni iPhone 14 modelləri üçün hazırlanmış variantında dəyişiklik edilməsə, iPhone SE 2022 ilə performans cəhətdən bənzər nəticə göstərəcəklər. 6,1 düymlük IPS LCD ekranda, 12MP təsvir ölçülü OIS dəstəkli kamerada və.s heç bir dəyişiklik gözlənilmir. Yalnız Face ID yeni nəsillə əvəzlənə bilər.
Hələlik 400 dollar ətrafında satışa çıxarılacaq yenilənmiş iPhone Xr modelinin təqdimat tarixi naməlum olaraq qalır. Bildirilir ki, iPhone SE 4 modeli iPhone 14 seriyasının qiymətindəki artım səbəbilə gözləniləndən daha tez satışa çıxarılacaq. Həmçinin, bu il təqdim edilmiş iPhone SE (2023) modelinin satışlarının da xeyli aşağı olması iPhone SE 4 modelinin sürətləndirilməsinə təkan verəcək. Bu vaxta qədər SE modelləri əsasən, yaz ayları baş tutan tədbirdə təqdim edilirdi. Lakin ikinci və üçüncü SE modelləri arasında 2 il fərq olub.
