Hər birimiz çəkilən şəkillərin maksimum dərəcədə keyfiyyətli olmasını istəyirik. Şəkillərin keyfiyyəti ilk növbədə smartfonun kamerasının gücünə bağlı olsa da proqram təminatı cəhətdən də keyfiyyəti artıran üsullar var. Məsələn, bəzi insanlar öz cihazlardan GCam adlanan üçüncü tərəf kamera tətbiqindən yararlanır. Bəziləri isə müxtəlif redaktə proqramları və ya xüsusi saytlar ilə şəkillərinin keyfiyyətini artırırlar. İstehsalçı firmaların özləri də bazardakı belə tətbiqlərə olan tələbatı görürlər. Belə ki, Samsung firması bulanıq və keyfiyyətsiz görünən şəkillərin keyfiyyətini artıran yeni Samsung Galaxy Enhance-X tətbiqini anons edib.
Samsung Galaxy Enhance-X tətbiqi Android 10 üzəri cihazlarda işləyəcək
Tətbiqin ən vacib xüsusiyyəti bulanıqlığı, şəkillərdə yaranan görüntü keyfiyyəti problemlərini və.s bərpa edə bilməkdir. Əlavə olaraq süni intellekt alqoritmləri ilə çalışan Samsung Galaxy Enhance-X tətbiqi şəkillərin təsvir ölçüsünü yüksəltmə, qaranlıqda çəkilmiş fotoları işıqlandırma, HDR kimi bir neçə funksiyaya da sahibdir.
Təəssüf ki, bütün Galaxy modellərində bu tətbiqi istifadə etmək mümkün olmayacaq. Bunun üçün Smartfonunuz minimum Android 10 əməliyyat sisteminə sahib olmalıdır. Əgər bu tələbi qarşılayırsınızsa, Galaxy Store mağazasından tətbiqi yükləyə bilərsiniz. Lakin regionlar üzrə Galaxy Store üzərində tətbiqin yükləmə üçün aktivləşdirilməsində gecikmələr yaşanar. Ona görə də hələ ki, ApkPure tipli tətbiq mağazalarından tətbiqi yükləyərək sınaqdan keçirməyiniz mümkündür. Bir müddət sonra rəsmi Galaxy Store platformasında da tətbiq hamının yükləməsi üçün əlçatan olacaq.
Samsung istifadəçisi deyilsinizsə oxşar xüsusiyyətləri Adobe Lightroom, Snapseed, Picsart tətbiqləri üzərində istifadə edə bilərsiniz. Lakin ən effektiv və yoxlamağınızı məsləhət görəcəyimiz sayt letsenhance.io olacaq. Bu sayt vasitəsilə öz keyfiyyətsiz şəkillərinizi ciddi şəkildə yaxşılaşdıra bilərsiniz. Samsung istifadəçiləri, siz bu yeniliyi necə dəyərləndirirsiniz? Fikirlərinizi rəylər hissəsində bizimlə bölüşə bilərsiniz.
