BMW şirkəti abunəlik sisteminə alıcılar tərəfindən qəribə qarşılana biləcək maraqlı bir yenilik gətirib. Belə ki, bəzi istehsalçı şirkətlər satdığı avtomobillərdən müəyyən əlavə gəlir qazanmaq məqsədilə bəzi abunəliklər təklif edirlər. Bu abunəliklər isə özünü daha çox multimedia və idarəni asanlaşdıran köməkçi xüsusiyyətlərdə göstərir. Uyğun olaraq BMW də öz müştərilərinə müəyyən abunəliklər təqdim edir. Hətta 2020-ci ildən etibarən İngiltərə, Almaniya, Yeni Zelandiya, Cənubi Afrika kimi ölkələrdə BMW şirkətinin abunəlikləri mövcuddur. Abunəlik, aylıq ödəniş etməklə avtomobilinzdə texniki cəhətdən mövcud olan xüsusiyyətlərdən yararlanmağınıza imkan verir.
BMW şirkəti abunəlik sisteminə oturacaq isitmə paketini də əlavə edib!
İndiyə qədər mövcud olan abunəlik sistemində adaptiv ön fənərlər, sürətin sabitlənməsi, xəritənin yenilənməsi tipli paketlər daxil idi. İndi isə şirkət birbaşa komforta təsir edəcək xüsusiyyəti abunəliyə daxil edir. Avtomobilinizdə isinə bilən oturacaqlar varsa belə, həmin oturacaqlardan istifadə edə bilməyəcəksiniz.
Çünki, avtomobildə bu xüsusiyyət aylıq ödəniş qarşılığında aktivləşdiriləcək. Şirkət bu yeniliyi nə vaxt və hansı ölkələrdə tətbiq etməyə başlayıb dəqiq bilinmir. Lakin verilən məlumata görə Cənubi Koreyadan başlayaraq BMW abunəliyinin mövcud olduğu İngiltərə, Almaniya və.s kimi bütün ölkələrdə bu yenilik artıq tətbiq olunub.
Əslində abunəliyə bu xüsusiyyətin əlavə edilməsi böyük bir ehtimalla standartlaşdırma ilə əlaqədardır. Yəni BMW bundan sonra istehsal edəcəyi avtomobilində bu xüsusiyyəti modifikasiya fərqi olmadan quraşdıra bilər. Lakin siz bu xüsusiyyətdən istifadə etmək üçün “oturacaq isitmə paketini“ abunəliklə almalı olacaqsınız.
İstehsalçı sizdən bu abunəliyə görə aylıq 18$, illik 180$, üç illik 300$ və ya “limitsiz” deyə qeyd olunan paketdə 415$ məbləğ tələb edəcək. “Limitsiz” üçün də 415$ az görünür. Yəni standartlaşdırma ehtimalı da öz qüvvəsini biraz itirəcək. Nəticə etibarilə alıcılar yüksək məbləğ ödəyərək aldıqları bu avtomobillərdə belə yorucu şeylərin olmasına o qədər də müsbət yanaşmırlar. Lakin gələcək bu tip yenilikləri vəd edir. Ona görə də bundan 10 il sonra avtomobilinizi sürmək üçün də abunəlik ödəməli olsanız təəccüblənməməyiniz məsləhətdir.
Siz bu barədə nələr düşünürsünüz? Fikirlərinizi şərhlərdə bizimlə bölüşə bilərsiniz.
