Rockstar Games milyonlarla oyunçunun səbirsizliklə gözlədiyi Grand Theft Auto VI (GTA 6) ilə bağlı yeni təqdimat tarixini açıqlayıb. Şirkət indiyədək yayımladığı treylerlərdə oyun prosesini ətraflı nümayiş etdirməsə də, bu ayın sonunda oyunun geniş təqdimat videosunu paylaşacaq. Maraqlısı isə odur ki, təqdimat ilk olaraq Netflix platformasında yayımlanacaq.
Rockstar Games-in məlumatına görə, “Grand Theft Auto VI: An Extended Look” adlı təqdimat 27 avqust tarixində yayımlanacaq. Netflix abunəçiləri videoya ilk baxış imkanı əldə edəcək, təqdimatdan təxminən altı saat sonra isə eyni video Rockstar Games-in rəsmi YouTube kanalı və rəsmi internet saytında da paylaşılacaq.
Yeni təqdimatda GTA 6-nın oyun prosesi, dünyası və əsas mexanikaları barədə daha ətraflı məlumatın göstərilməsi gözlənilir. İndiyədək yayımlanan iki treyler əsasən süjet və atmosferə fokuslanmışdı, lakin yeni təqdimatın ilk geniş gameplay nümayişi olacağı ehtimal edilir.
GTA 6 oyunçuları yenidən Vice City şəhərinə aparacaq. Oyunun süjeti cinayət dünyasına birlikdə daxil olan iki əsas qəhrəman – Ceyson və Lüsiya ətrafında cərəyan edir. İlk dəfə olaraq Grand Theft Auto seriyasının hekayə rejimində oynanıla bilən qadın baş qəhrəman təqdim ediləcək.
Rockstar Games daha əvvəl GTA 6-nın 19 noyabr 2026-cı ildə PlayStation 5 və Xbox Series X|S platformaları üçün satışa çıxacağını təsdiqləyib. Şirkət həmçinin bildirib ki, oyun ilk mərhələdə yalnız hekayə rejimi ilə təqdim olunacaq, onlayn rejim isə sonradan əlavə ediləcək.
