Bir vaxtlar fəaliyyət kameraları (action camera) bazarının şəksiz lideri olan “GoPro” ciddi maliyyə böhranı ilə üz-üzədir. Şirkətin son rüblük maliyyə hesabatlarının gözləntilərin altında qalması və gəlirlərin kəskin azalması, birjada “GPRO” kodlu səhmlərin tarixin ən aşağı səviyyəsi, 1 dolların altına düşməsinə səbəb olub. Bu kəskin ucuzlaşma maliyyə analitikləri və texnologiya dünyasında “GoPro iflas edir?” sualını yenidən gündəmə gətirib.
Maliyyə hesabatlarına görə, GoPro-nun gəlirləri ötən ilin eyni dövrü ilə müqayisədə 11% azalaraq 212 milyon dollara geriləyib. Daha da narahatedici məqam odur ki, şirkətin xalis zərəri 31 milyon dollardan 34 milyon dollara yüksəlib. Şirkətin baş icraçı direktoru (CEO) Nikolas Vudman (Nicholas Woodman) bu uğursuzluğu pərakəndə satış kanallarındakı zəiflik və bəzi əsas məhsulların təqdimatının gecikməsi ilə əlaqələndirib. Lakin ekspertlər əsas problemin smartfon kameralarının güclənməsi və Çinli rəqiblərin bazara daha innovativ məhsullar çıxarması olduğunu bildirirlər.
Yaşanan bu böhran fonunda GoPro rəhbərliyi vəziyyətdən çıxış yolları axtarır. Şirkətin maliyyə direktoru Brayan MakGi (Brian McGee) investorlarla görüşdə GoPro-nun gələcəyini qorumaq üçün strateji variantları, o cümlədən şirkətin tamamilə və ya qismən satışını nəzərdən keçirdiklərini etiraf edib. Hazırda restrukturizasiya planı çərçivəsində qlobal işçi qüvvəsinin 4%-nin ixtisar edilməsi və xərclərin 12 milyon dollar azaldılması hədəflənir.
Birja qaydalarına (NASDAQ) görə, səhmləri ardıcıl olaraq 1 dolların altında qalan şirkətlər siyahıdan çıxarılma (delisting) riski ilə qarşılaşırlar. GoPro-nun bu vəziyyətdən xilas olmaq üçün ilin sonuna doğru təqdim edəcəyi yeni nəsil kameralara və abunəlik sistemindən gələn gəlirlərə ümid bəslədiyi vurğulanır. Əks təqdirdə, texnologiya nəhənglərindən birinin GoPro-nu satın alması və ya brendin tamamilə tarixə qarışması qaçılmaz görünür.
