Bir əsrdən çox əvvəl, məşhur ixtiraçı Nikola Tesla elektrik enerjisinin simsiz ötürülə biləcəyi bir gələcəyi xəyal edirdi. Qüllələr vasitəsilə bütün dünyaya pulsuz elektrik enerjisi paylamağı planlaşdıran Tesla-nın vizyonu, dövrün texnoloji və iqtisadi məhdudiyyətləri səbəbindən yarımçıq qalmışdı. Ancaq indi ABŞ Müdafiə Nazirliyinin qabaqcıl tədqiqat agentliyi olan DARPA bu arzunu reallaşdırmağa bir addım daha yaxınlaşıb. Lazer texnologiyası ilə həyata keçirilən son sınaqda heç bir fiziki əlaqə olmadan 800 vatt elektrik enerjisini 8,6 kilometr məsafəyə uğurla ötürərək rekord qırıb.
Tesla-nın 1901-ci ildə inşa etdiyi məşhur Wardenclyffe Tower elektrik enerjisini naqilsiz ötürmək məqsədi daşıyırdı. Onun sözlərinə görə, Yerin təbii rezonansından istifadə etməklə enerji böyük məsafələrə yayıla bilərdi. Bu layihə dövrün maliyyə və mühəndis çatışmazlıqlarına görə dayandırılmışdı. Teslanın fikirləri illər sonra elm aləmində öz əksini tapmışdı. DARPA-nın POWER (Persistent Optical Wireless Energy Relay) proqramı simsiz enerji ötürülməsində yeni nəsil texnologiya ilə Teslanın nəzəriyyələrini həyata keçirmək potensialına malikdir. DARPA lazer şüaları ilə enerji daşıyan optik ötürmə sistemləri ilə enerji ötürməyi hədəfləyir.
Nyu Meksikoda keçirilən son sınaqlarda DARPA 800 vatt enerjini 30 saniyə ərzində 8,6 kilometr (5,3 mil) məsafəyə naqilsiz ötürməyi bacarıb. Əvvəlki sınaqlarda 230 vatt 1,7 kilometr məsafəyə ötürülürdü. Bu inkişaf lazer enerjisinin ötürülməsində irəliyə doğru əhəmiyyətli bir sıçrayışı təmsil edir. POWER komandası həmçinin ötürülən elektrik enerjisinin bir hissəsini istifadə edərək popkorn hazırlayıb. Bununla belə, sistemin əsasını PRAD (Power Receiver Array Demo) adlı xüsusi qəbuledici struktur təşkil edir. Bu sferik quruluşun içərisində lazer şüasını yüzlərlə fotovoltaik hüceyrəyə yayan parabolik güzgü var. Lazer şüası bu hüceyrələrə dəyərək yenidən elektrik enerjisinə çevrilir. Sistemin səmərəliliyi hazırda 20 faiz ətrafındadır; bu sınaq mərhələsində məqbul nisbət hesab olunur.
