İnnovasiya və Rəqəmsal İnkişaf Agentliyi tərəfindən rəqəmsal hökumətin inkişaf dinamikasını əks etdirən 2024-cü il göstəriciləri təqdim edilib. Hesabatda rəqəmsal xidmətlərin genişlənməsi, istifadəçi statistikası, dövlət qurumları arasında informasiya mübadiləsinin müqayisəli təhlili və ekoloji təsirlər kimi məlumatlar yer alır.
“mygov” platformasının imkanları genişləndirilib
“mygov” rəqəmsal hökumət platformasının funksionallığı və imkanları artırılıb. Şəxsiyyət vəsiqəsi, doğum, ölüm, nikah şəhadətnaməsi kimi zəruri rəqəmsal sənədlər platformaya əlavə olunub və hüquqi qüvvələri təmin edilib. Vətəndaşlar bu sənədləri rəqəmsal formada aidiyyəti qurumlarla bölüşə bilirlər. Bundan əlavə, “Məlumatlarım” bölməsində vətəndaşlara aid 45-dən çox məlumat əks olunub. Platformada məhkumluq haqqında arayışın alınması, YİHO üçün qeydiyyat, elektrik doldurma məntəqələrinin siyahısı, pensiya kalkulyatoru, notariat və kommunal sahələrə aid xidmətlər də yer alır. Eyni zamanda əsas həyat hadisələri üzrə xidmətlər də rəqəmsallaşıb. Belə ki, vətəndaşlar artıq doğum şəhadətnaməsi, nikah şəhadətnaməsi və ölüm haqqında şəhadətnamənin əldə edilməsi üçün “mygov” vasitəsilə rəqəmsal formada müraciət edə bilirlər.
2024-cü il göstəricilərinə görə, “mygov”-un istifadəçi sayı 964 min, tətbiq üzərindən aparılan əməliyyatların sayı 923 min, aktiv istifadəçi (30 gün ərzində istifadə) sayı 415 min olub. Platforma üzərindən vətəndaşlara 565 min bildiriş göndərilib. İstifadəçilərin rəylərinə əsasən, məmnuniyyət səviyyəsi 97% təşkil edib.
Dövlət qurumları arasında sənəd dövriyyəsi tamamilə rəqəmsallaşdırılaraq kağızsız həyata keçirilib
Ötən ildə bütün dövlət qurumlarının Rəqəmsal Sənəd Dövriyyəsi (RSD) altsisteminə inteqrasiyası təmin edilib. Hazırda 2200-dən çox qurum bu sistemə qoşulub. Sənəd mübadiləsi ayda 1 milyondan çox vərəqənin istifadəsinə qənaət edilməsinə imkan yaradır ki, bu da illik təxminən 2 min ağacın qorunması deməkdir.
Dövlət qurumları arasında məlumat mübadiləsinin həcmi artıb
“digital.bridge” – Milli Məlumat Mübadiləsi sistemi aparılan əməliyyatların sayı ilə nəzərəçarpacaq dərəcədə yüksəliş göstərib. 2022-ci illə müqayisədə 120%, 2023-cü illə müqayisədə 51% artım qeydə alınıb. Sistemə 150-dən çox informasiya sistemi, 70-dən çox dövlət qurumu inteqrasiya olunub. Həyata keçirilən məlumat mübadilələri il ərzində təxminən 10 mindən çox ağacın kəsilməsinin qarşısını alır. Gündəlik 1,5 milyon məlumat tranzaksiyası həyata keçirilir.
Vahid giriş sisteminin əhatə dairəsi və istifadəçi sayı genişləndirilib
“digital.login” vahid giriş sisteminə 160-dan çox informasiya sistemi qoşulub. Sistemdə aylıq 7 milyondan çox əməliyyat icra olunur. Əməliyyatların sayında 2020-ci illə müqayisədə 380%, 2021-ci illə müqayisədə 364%, 2022-ci illə müqayisədə 221%, 2023-cü illə müqayisədə 143% artım müşahidə edilib. Son illərin artım templərinə baxdıqda istifadəçi sayı 2020-ci illə müqayisədə 147%, 2021-ci illə müqayisədə 82%, 2022-ci illə müqayisədə 59%, 2023-cü illə müqayisədə 32% artıb. Sistemdə hazırda 4 milyondan çox aktiv istifadəçi var.
