Bildiyimiz kimi, süni intellekt nəhəngi OpenAI keçən ayın əvvəlində yeni ChatGPT Pro abunə xidmətini təqdim edib. OpenAI-nin baş direktoru Sam Altman açıqlamasında bu planın şirkətin pul itirməsinə səbəb olduğunu bildirib. Beləliklə, OpenAI şirkəti yeni istifadəyə verilən 200 dollarlıq ChatGPT Pro abunəliyindən pul itirir.
OpenAI-nin CEO-su Sam Altman verdiyi açıqlamalarda şirkətin aylıq 200 dollarlıq ödəniş qarşılığında təklif etdiyi ChatGPT Pro planından gözlənildiyindən çox istifadə edildiyi üçün zərər çəkdiyini bildirib. Altman bu qiyməti özünün seçdiyini və əvvəlcə bu planla qazanc əldə etməyə ümid etdiyini bildirib. Ötən ay istifadəyə verilən ChatGPT Pro istifadəçiləri qabaqcıl düşünmə bacarıqlarına malik süni intellekt modeli olan o1-in Pro rejiminə çıxış əldə edirlər. Bundan əlavə, video istehsalına diqqət yetirən Sora kimi alətlər üçün sürət məhdudiyyətləri qaldırılır. Bu yeni modellərə əlavə olaraq o1, o1-mini, GPT-4o və Advanced Voice kimi qabaqcıl modellərə də məhdudiyyətsiz giriş verilir.
Ancaq Sam Altmanın pul qazanmaq ümidi ilə təyin etdiyi 200 dollar qiymətinə baxmayaraq, bu xidmət pul qazandırmır deyə bildirib. OpenAI qurulduğu gündən bəri təxminən 20 milyard dollar vəsait toplasa da, hələ ki, gəlirli şirkət deyil. Bildirilir ki, şirkətin 2024-cü il üçün 3,7 milyard dollar gəlirlə 5 milyard dollar zərər gözləntiləri var. Bu yüksək xərclərin əsas günahkarları işçilərin maaşları, ofis icarəsi və süni intellekt təlim infrastrukturudur. OpenAI ChatGPT-nin əməliyyat xərclərini açıqlamaqda çox şəffaf deyil, lakin əvvəlki hesabatlar xidmətin gündə 700 min dollara başa gəldiyini ortaya çıxarır. Şirkət etiraf edib ki, OpenAI-nin bu cür problemləri həll etmək üçün daha çox kapitala ehtiyacı var. Bununla əlaqədar olaraq şirkətin restrukturizasiya prosesinə girəcəyi və mənfəət yönümlü struktura çevriləcəyi açıqlanıb. Bundan əlavə, şirkət gəlirliliyə nail olmaq üçün abunə planlarının qiymətlərini artırmağı düşündüyünü deyir.
