Huawei Watch Fit 2 modelində, birinci versiya ilə müqayisədə funksionallıq xeyli artıb. Birinci nəsil Watch Fit modeli istifadəçilər arasında çox populyar olmuşdu. Yeni model ilə siz artıq zənglərə, mesajlara cavab verə, ödənişlər edə və aktivliyinizıə bağlı planlar qura bilərsiniz. İndi isə keçək daha detallı icmala.
Klassik dizayn həmişə sevilir
Huawei Watch Fit 2 modeli iki versiyada mövcuddur: Active və Classic. Biz sizə klassik model haqqında məlumat verəcəyik. Bu versiyanın gövdəsi alüminiumdan hazırlanıb və qayışın (həqiqi dəri) qalınlığı 20-mm təşkil edir. Xarici görünüşü premium sinifə aid olduğunu hiss etdirir. Qeyd edək ki, Fit 2 modelini çox ehtiyyatla istifadə etməlisiniz. Üzərinə çox asanlıqla çızıqlar düşə bilir. Saat suda 50 metr dərinliyə qədər (5 ATM) istifadə edilə bilər. Çəkisi 30 qram olduğunda onu gün ərzində rahatlıqla istifadə edə bilərsiniz.
Huawei Watch Fit 2 – “Bomba” ekranı var!
Fit 2 modeli 1,74-düym və 336×480 piksel təsvir ölçülü AMOLED panellə təchiz olunub. Bu panel 336 ppi piksel sıxlığı verir və görüntünün tam aydın olmasını təmin edir. Ekran ön panel sahəsinin 72,2%-ni əhatə edir. Amma korpusun rəngini və tünd rəngli kənarları nəzərə alsaq, ekranın çərçivələri çox gözə çarpmır. Baxış bucağı genişdir və günəş şüaları altında istifadəsi əladır. Ekran yüksək keyfiyyətli oleofob örtüklü 2.5D şüşə ilə qorunur. Saat təəssüf ki, Always on Display (həmişə açıq ekran) funksiyasını dəstəkləmir.
Watch Fit 2 modelində HarmonyOS imkanları
Yeni Fit 2 modelinin interfeysi, öncəki nəsillə müqayisədə ciddi şəkildə təkmilləşdirilib. İnterfeys daha aydın və asan anlaşılan olub, həmçinin mikro donmalar azaldılıb. İstifadəçi yuxarı sürüşdürmə ilə sürətli sazlamalar edə, sola sürüşdürmə ilə vidjet panelinə girə, sağa sürüşdürmə ilə isə tətbiqlərə sürətli keçid edə bilər. Aşağı sürüşdürmə isə bildiriş mərkəzini açır. Yaddaşda 10 bildiriş saxlanıla bilər.
Həmçinin Huawei Watch Fit 2 istifadəçiləri gələn mesajlara birbaşa saatdan emojilər və ya öncədən hazırlanmış mətnlər ilə cavab verə bilərlər. Cihazın üzərində bir ədəd fiziki düymə var. Düyməni bir dəfə qısa basdıqda sizi əsas ekrana qaytarır. Düyməni sıxıb saxladıqda isə cihazı söndürmək və ya təkrar başlatmaq mümkündür.
Fit 2 modelinin smartfon ilə bağlantısı enerjiyə sərfiyyatı cəhətdən səmərəli Bluetooth 5.2 texnologiyası və “sağlamlıq” tətbiqi vasitəsi ilə həyata keçirilir. Bu tətbiq vasitəsi ilə istifadəçi sağlamlıq göstəricilərinin statistikasını izləyə bilər. Saatda öncədən quraşdırılmış 12 ədəd siferblat (elektron dildə desək interfeys) var. Əlavə olaraq 200-dən çox fərqli görünüşü də yükləyə bilərsiniz (təxminən yarısı ödənişlidir). Quraşdırılmış NFC modulu hesabına təmassız ödənişlər edə bilərsiniz. Cihazın digər sevindirci funksiyası Bluetooth ilə zənglərin dəstəklənməsidir. Huawei Watch Fit 2 modeli kifayət qədər yetərli səs ucaldanlara və mikrofona sahibdir. Bunun hesabına səs-küy və küləkli hava şəraitində problemsiz danışıqlar apara bilərsiniz.
Huawei Watch Fit 2 ilə daimi hərəkətdə olacaqsınız!
Watch Fit 2 modeli istifadəçini mümkün olduqca çox hərəkət etdirir. Əgər istifadəçi bir yerdə uzun müddət oturursa, saat ona qısa məşq etmək lazım olduğunu xatırladacaq. İstifadəçilərdə daha çox həvəs yaradan funksiya fiziki aktivlik ilə bağlı günlük qoyulan məqsədlər olacaq. Saatda 7 fərqli animasiyalı məşqlər var. Hansı ki, idman ilə məşğuliyyəti maksimal effektiv və maraqlı edəcək.
Ümumi olaraq Fit 2 modelində 97 məşq növü var və onlar avtomatik müəyyən oluna bilər. Gün ərzində atdığınız addım və getdiyiniz məsafəni cihaz GPS peyk sistemləri hesabına tam dəqiq hesablayır. Bir məqamı qeyd edək ki, cihazda yer müəyyən etmə funksiyasını istifadə etdikdə saatın gövdəsi qızır. Əgər həddindən artıq isti hava şəraiti varsa, cihaz qızma haqqında bildiriş verir və məşq tətbiqini bağlayır.
Sistemdə daha bir yenilik “Healthy Living” funksiyası olub. Qoyduğunuz məqsəddən asılı olaraq, məsələn yuxu keyfiyyətini artırmaq və ya imuniteti gücləndirmək kimi, saat gündəlik hədəf planınızı hazırlayacaq. Cihaz sizə nə zaman istirahət etməli, nə vaxt məşq etməli və nə qədər məsafə qət etməli olduğunuzu bildirəcək. Cihaza xüsusi sensorlarla ilə ürək döyüntü tezliyini, yuxu keyfiyyətini, stress səviyyəsini və qanda oksigen miqdarını göstərə bilir.
Saatın enerji saxlama cəhətdən problemi yoxdur
Huawei şirkətinin sözlərinə əsasən, cihaz 292 mAh tutumlu batareya ilə 10 gün rahat istifadə oluna bilər. Real sınaqlar da bunu təsdiqləyib. Smartfon ilə daimi sinxronizasiya (bildiriş və zəng qəbulu) və sağlamlığın daimi izləməsi ilə, günlük təqribən 9% şarj istifadə olunur. Məşq rejimində isə aktiv GPS ilə bir neçə saata 8% şarj istifadə etmiş olacaqsınız.
Huawei Watch Fit 2 modelində iki kontaktlı şarj girişindən istifadə edilir. Əgər şarj zamanı cihaza dəysəniz, zəif maqnit konstruksiyası səbəbindən, şarj dayanacaq. Qutuda saat üçün şarj bloku qoyulmadığı üçün, sınaq standart 18 Vt adapter ilə aparılıb. Cihaz 50% şarjı 20 dəqiqəyə, 100% şarjı isə 55 dəqiqəyə yığa bilmişdir.
Yekunda deyə bilərik ki, Huawei şirkəti çox gözəl məhsul yarada bilib. Cihazda işləmə müddəti və funksionallıq arasında balans yaxşı vəziyyətdədir. Digər müsbət tərəflərinə isə Bluetooth ilə zəng, dizayn, əla ekran və sağlamlıq/idman funksiyalarını əlavə edə bilərik.
