Sırf qadınlar düşünülərək onların diqqətini çəkəcək qədər zərif, eyni zamanda texnoloji aksesurlarının parçası ola biləcək bir şey göstərin desək çoxlarınızın ağlına ilk ağıllı saatlar gələcək. Lakin əslində bu da doğru cavab olmayacaq. Çünki, ağlınıza gəlmiş premium saatların belə əksəriyyəti maksimum qayışın rənginin dəyişdirilməsi ilə bəlkə istədiyimizə cavab olacaq. Huawei isə həqiqətən qadın müştərilərini hədəf alaraq belə bir məhsul hazırlayıb. Söhbət, Kişi müştəriləri də sanki hədiyyə almağa təşviq edəcək qədər gözəl qutusu ilə özünə çəkən FreeBuds Lipstick qulaqlığından gedir.
FreeBuds Lipstick | QUTUSU VƏ DİZAYNI
Olduqca erqonomik və yuxarıda da qeyd etdiyimiz kimi hədiyyə alacaqlar üçün xeyli ideal qutulama ilə Huawei FreeBuds Lipstick qulaqlığı bizlərə ilk baxışdan gözəl hissiyat yaşadır. Seçiminizə görə 2 fərqli rəngdə təqdim edilən FreeBuds Lipstick, Huawei-in Fransada yerləşən estetik tədqiqat mərkəzi tərəfindən araşdırmalar aparılaraq hazırlanıb. Qulaqlığın qabı mükəmməl bir mühəndislik mərhələsindən keçərək hamar, güzgüyə bənzər paslanmaz poladdan hazırlanmış gövdəyə sahibdir. Xüsusilə qab cızılmalara qarşı dayanıqlı olub rəngini uzun müddət və davamlı saxlaması üçün yüksək temperaturda cilalanaraq emaldan keçirilib. Düzbucaqlı və nisbətən “kəskin” kənarlı dizaynı fərah bir görüntü ortaya qoyur. Təbii ki, belə bir polad gövdəyə, qaba sahib olması ağıla zamanla korroziyaya uğraya bilərmi deyə qəribə sual gətirməsin deyə Huawei tərəfindən PVD texnologiyalı mikron örtüyün də korroziya davamlılığını artırması üçün işlədildiyi bildirilir.
Qulaqlıq dodaq boyasından ilham alınaraq hazırlandığından qapağı da gövdəyə bitişik deyil. Qulaqlıqları yuvasından çıxarmaq üçün qapağı sözün əsl mənasında açmağınız lazımdır. Qapağın sağlamlığı barədə şübhəniz olmasın. 2 nöqtədən güclü maqnitlər ilə qapaq gövdəyə yapışır. Hətta qapağın yerinə nə qədər mükəmməl oturduğunu çıxardığı səsdən belə anlaya bilərsiniz. Əlinizdə sallasanız belə yerindən düşməz. Yəni yaşaya biləcəyiniz ən böyük problem diqqətsizlikdən yanlışlıq qapağı tərsinə tutaraq açmaq ola bilər. Amma şarj girişinin aşağıda olduğuna fikir versəniz belə bir hal yaşanmayacaq. Qulaqlıqlar da maqnitlərlə yuvaya bərkidilib, amma əslində bu qulaqlıqlar FreeBuds 4-ün eynisidir. Sadəcə Freebuds Lipstick üçün yenidən uyğunlaşdırılıb.
Qulaqlıq özü yüngül olması üçün plastik materialdan hazırlanıb. Amma xrom hissiyatını itirməməsi üçün səthi xüsusi materialla örtülüb. Beləliklə, qulağınıza taxsanız belə həqiqətən metal bir şeyə təmas edirmiş kimi düşünəcəksiniz. Qulaqlıq rezin tumurcuqlara sahib deyil deyə sürətli hərəkət edərkən qulağınızdan sürüşmə ehtimalı yaranır. Ona görə də, qulağınızda olarkən yavaş hərəkət etməyiniz məsləhət görülür.
FreeBuds Lipstick | SƏS KEYFİYYƏTİ
FreeBuds 4 qulaqlığı səs keyfiyyəti cəhətdən yüksək performans ortaya qoyur. 14,3mm LCP (Liquid Crystal Polymer) diafraqmaya sahibdir. 40kHz tezliyə qədər dinamik aralığa sahib olması dinləyəcəyiniz musiqinin xırdalıqlarını eşitməyə sizə kömək edəcək. Tiz səslər, baslara nisbətən ön plandadır. Balans isə yaxşı qorunub. Qulaqlığı Huawei AI Life tətbiqi ilə bağlayıb işlətməyiniz məsləhət görülür. Məsələn, MIUI iterfeysli bir cihazda qulaqlığı ilk dəfə işlətsəniz bəlkə qane ola bilərsiniz. Amma xüsusilə HarmonyOS əlaqəli və ya Huawei ekosisteminin daxilində olan cihazlara bağladıqda səs keyfiyyətinin çox yaxşı optimizasiya edildiyini və fərqi anlayacaqsınız. Bu fərqi isə AI Life tətbiqi işlətdiyiniz cihazdan asılı olmayaraq ən optimal keyfiyyətə gətirməyə kömək olacaq.
FreeBuds 4 ilə müqayisədə qəribə də olsa FreeBuds Lipstick nisbətən daha yaxşı ANC xüsusiyyəti, aktiv səs-küy nəzarəti vəd edir. Ola bilsin ki, FreeBuds 4 üzərinə FreeBuds Lipstick hazırlanarkən bununla bağlı nələrsə yenilənib. Amma texniki detalları kağız üzərində sabit görünür. Qeyd etdiyimiz kimi rezin tumurcuqların olmaması yenə də səs-küyün azaldılmasında öz təsirini göstərir. Bəli, ANC öz işini yerinə yetirsə də biraz zəif qaldığını qeyd etməliyik. Səs izolyasiyası pis deyil, amma çölə müəyyən qədər səs sızdırır. Mikrofonlar isə telefon danışıqlarınız üçün rahatlıqla kifayət edəcəkdir.
FreeBuds Lipstick | BAĞLANTI VƏ BATAREYA VƏZİYYƏTİ
HarmonyOS ilə birlikdə qulaqlıqda işlədilən Kirin A1 çipi səs effektlərini xeyli genişləndirir. Bağlantı cəhətdən Huawei ekosistemi daxilində problem yaşatmasa da digər Android smartfonlarda sadə Bluetooth bağlantısından əlavə AI Life tətbiqinə deyərdik ki, məcburi də olsa ehtiyac yaranır.
Qulaqlığın özəllikləri geniş olduğundan və böyük bir ehtimalla tətbiq vasitəsilə əlavə sazlamalar etdiyindən işlətməyə başlamamış tətbiqi quraşdırmaqdan çəkinməyin. İki mənbəyə eyni vaxtda bağlanma xüsusiyyəti vardır. Hansı cihazdan səs almaq istədiyinizi özünüz bu parametrlərdən seçə bilərsiniz. Gecikmələr demək olar yoxdur. Ən azından sadə istifadə zamanı hiss edilmir. Oyunlarda da işinizi görə bilər.
Batareya performansına gəldikdə hər qulaqlıqda 30mAh, qabda isə 410mAh batareya vardır. Səs səviyyəsi ~90% seçilib bir saat musiqiyə qulaq assanız 33-34% batareya sərf etmiş olacaqsınız. Bu şəraitdə təqribi 3 saat 10 dəqiqəyə qulaqlıqların batareyası boşalacaqdır. Səs səviyyəsini yarıya qədər azaltsanız 4 saata qədər bu müddəti uzada bilərsiniz. Bu test zamanı ANC funksiyası deaktiv idi. Əgər ANC aktiv edilsə və səs-küyləri də eyni zamanda azaltmaq istəsəniz bu zaman enerji sərfiyyatı daha da artacaq. Davamlı saatlarla istifadə etmək də yaşanan hal olmadığından ümumilikdə qab ilə birlikdə batareya müddətini xeyli artıra bilərsiniz. Həm qabın, həm qulaqlıqların batareyası boşalsa sıfırdan hamısının doldurulması təqribi 1.5 saat çəkir.
Qulaqlığı almağa dəyərmi?
FreeBuds Lipstick qulaqlıqları eynilə FreeBuds 4 modelində olduğu kimi iki dəfə toxunma, basılı saxlama və sürüşdürmə xüsusiyyətlərini dəstəkləyir. Qulaqlığı çıxardıqda avtomatik dayanma və taxdıqda işləmə xüsusiyyəti də normal olaraq mövcuddur. İki dəfə toxunduqda səs dayanır və ya davam edir, eyni zamanda zənglərə imtina edir və ya cavab verir. Basılı saxladıqda ANC xüsusiyyətini açır. Səs isə sürüşdürərək dəyişdirilir. Lakin yenə adın çəkəcəyimiz AI Life tətbiqi ilə düymələrə özünüz istədiyiniz formada sazlama edə bilərsiniz.
Nəticə etıbarilə bu qulaqlıq sadə bir musiqi dinləmə ehtiyacından daha çox bahalı bir aksesuar olduğundan özünəməxsus yeri vardır. Məsələn, qulaqlıqları çıxarıb qabına qoyub stolun üstünə yerləşdirsəniz həqiqətən də diqqət cəlb edəcəkdir. Qabın dizaynı istər-istəməz bu şeyin nə olduğuna dair insanlarda maraq oyadacaq. Qulaqlıqların əsl məqsədi olan musiqi dinləməyə gəldikdə isə sizi qane edəcəkdir. Hətta daha aşağı səviyyəli bir qulaqlıqdan keçən və ya daha əvvəl belə bir təcrübəsi olmayan şəxs, FreeBuds Lipstick ilə bağlı tamamilə yüksək fikirdə olacaqdır. Qiyməti, təqribi 250$ təşkil edir.
