Apple, Bir neçə həftə əvvəl keçirilmiş WWDC 2022 konfransında bir-birindən maraqlı yenilikləri təqdim etmişdi. Yeniliklər isə əsasən əməliyyat sistemlərinin ətrafında cəmləndiyindən istifadəçi təcrübəsinə müsbət təsir göstərən detallar yetəri qədər çox idi. Xüsusilə iOS 16 əməliyyat sisteminin gətirdiyini yeniliklər çox maraqlı alınmışdı. Kilid ekranındakı şəkillərin süni intellekt dəstəyiylə zənginləşdirilməsindən tutmuş, Android cihazlardakı Google Lens tətbiqinin görüntülərdən mətnləri ayırmasına oxşar bir xeyli yenilik gətirilmişdi. Belə ki, iOS 16 əməliyyat sisteminə daha bir diqqət çəkən yenilik əlavə olunub. iPhone modelləri bundan sonra “mən robot deyiləm” tipli CAPTCHA təsdiqləməsini özü edə biləcək. İstifadəçinin əvvəlki kimi düyməyə toxunmasına ehtiyac qalmayacaq.
Bəli, artıq iPhone istifadəçiləri bir addım daha öndədir!
CAPTCHA,(Completely Automatic Public Turing test to tell Computers and Humans Apart) sözlərinin baş hərflərinin birləşməsindən yaranır. Ən sadə formada insanı kompüterdən fərqləndirmək üçün istifadə edilən test hesab olunur. Saytlarda qarşımıza çıxan CAPTCHA təsdiqləmələri təhlükəsizlik məqsədilə tətbiq edilir. Lakin insanların tez-tez qarşısına çıxan təhlükəsizlik divarı məlum məsələdir ki, biraz bezdiricidir. Apple bu nöqtədə iOS 16 əməliyyat sisteminə avtomatik CAPTCHA təsdiqləməsi funksiyasını əlavə edərək istifadəçilərin işini asanlaşdırır.
Bəs iPhone modelləri CAPTCHA təsdiqləmələrini necə avtomatik dolduracaq?
Robot testini təsdiqləyən robot sisteminin işləmə prinsipi ilə bağlı Apple açıqlama verməkdən çəkinməyib. Şirkət bunun üçün “PrivateToken” adı verilən yeni bir HTTP autentifikasiya metodundan yararlanacaq. Daxil olduğunuz saytın serveri və işlətdiyiniz iOS 16 əməliyyat sisteminə sahib iPhone modeli arasında xüsusi şifrələmə ilə qarşı tərəfə smartfonun təhlükəsiz bir cihaz olduğu ilə bağlı məlumat ötürüləcək. Lakin ola bilsin ki, bu xüsusiyyət bəzi saytlarda işləməyə bilər. Apple şirkətinin verilənlər bazasında CAPTCHA təsidləməsi ilə bağlı saytların qeydiyyatlı olması lazımdır.
Bu xüsusiyyətdən yararlanmaq üçün Apple ID parametrlərinə daxil olub, “Privacy and Security (Məxfilik və Təhlükəsizlik)” bəndindən siyahının ən sonunda yerləşən “Automatic Verification (Avtomatik Təsdiqləmə)” xanasını aktivləşdirməlisiniz. Apple tərəfindən bu addımın nə qədər doğru olduğu isə müzakirə mövzusudur. Çünki, bu addım CAPTCHA xüsusiyyətinin varlığını tamamilə əhəmiyyətsiz edəcək.
