Smartfonlarda işlədilən kamera sensoru istehsalçıları arasında Sony ilə bərabər liderliyi bölüşən Samsung şirkəti ikinci nəsil 200MP kamera sensorunu təqdim edib. Ötən il sentyabr ayında təqdim edilmiş ilk 200MP kamera sensoru olan ISOCELL HP1 sensorundan təqribi 10 ay müddət keçib. Lakin hələ də heç bir istehsalçı, heç Samsung şirkətinin özü belə ISOCELL HP1 200MP kamera sensorunu hansısa cihaza quraşdırmayıb. Bunun müxtəlif səbəbləri ola bilər. Ehtimal edilən ən böyük problemlərdən biri hazırlanmış bu sensorun testlərdə istənilən qədər optimal nəticə verməməsidir. Hətta 200MP rəqəmi təsvir ölçüsü kimi çox böyük görünsə də sensorun fiziki ölçüsü düşündüyünüz qədər böyük deyil. Məsələn, ISOCELL GN2 50MP kamera sensoru ilə müqayisədə ISOCELL HP1 200MP daha kiçik sensor ölçüsünə malikdir. İndi isə gəlin bu gün təqdim edilmiş ISOCELL HP3 200MP kamera sensoruna biraz yaxından baxaq.
ISOCELL HP3 kamera sensoru ilə bağlı detallar bizi biraz təəccübləndirir
Belə ki, HP3 200MP kamera sensoru 1/1.4 düymlük sensor ölçüsünə sahibdir. Üstdəki abzasda ISOCELL GN2 50MP kamera sensorunun ISOCELL HP1 200MP kamera sensorundan daha böyük olduğunu deyirdik. Lakin burda ISOCELL HP3 kamera sensorunun ISOCELL HP1 sensorundan belə daha kiçik olduğunu görürürük. Qeyd edilir ki, sensor ölçüsünün 12% azalması yeni HP3 sensorunun daha çox smartfonda istifadə edilməsini asanlaşdırır və kamera modulu daxilində 20% daha az yer tələb edir.
Bu açıqlamaya cümlə kimi yanaşsaq məntiqlidir, amma cümləni analiz etdikdə o qədər də məntiqli olmadığını görə bilərik. Smartfon istehsalçıları kamera performansını yaxşılaşdırmaq üçün daha böyük sensor ölçüsünə sahib kameralara önəm verirlər. Digər bir tərəfdən onsuzda kamera modulları kifayət qədər böyük və qalındır. Şirkət elə bil bu addımı smartfonları düşünərək atmayıb. Düşünürük ki, maliyyəti azaldacaq HP3 200MP sensoru orta və ya orta-üst seqment cihazlarda daha rahat istifadə edilərək bazara daxil olmaq məqsədilə hazırlanıb. Nəticədə alıcı sensor ölçüsünə yox, təsvir ölçüsü olan 200MP yazısına diqqət edəcək.
ISOCELL HP3 200MP sensorunun hər bir pikseli 0.56μm ölçüsündədir. Tetrapixel texnologiyası vasitəsilə 16 piksel birləşib 2.24μm ölçülü tək bir piksel kimi davrandıqda 12,5MP təsvir ölçülü, 4 piksel birəşib 1.12μm ölçülü tək bir piksel kimi davransa 50MP təsvir ölçülü görüntülər qeydə ala bilər.
Smart-ISO Pro xüsusiyyəti ilə 4 trilyona qədər rəng dəstəkləyən 14 bit görüntülər çəkə biləcəyiniz bu sensor, Super QPD olaraq adlandırılmış avtofokus dəstəyinə sahibdir. Daha sürətli və daha dəqiq avtofokus edə bilən ISOCELL HP3 sensoru 8K 30FPS-ə qədər video qeydlər etməyiniz üçün uyğundur. Bu sensor RAW 10, RAW 12, RAW 14 çıxış formatlarını dəstəkləyir. Effektiv təsvir ölçüsü 200.540.160 (16.320 x 12.288) pikseldir.
