Hakerlər 2023-cü ilin dekabrında Grand Theft Auto V (GTA V) oyununun bütün mənbə kodunu internetə sızdırmışdılar. Beləliklə, indi məlum olub ki, GTA 5 yaxın gələcəkdə sızdırılmış mənbə kodu sayəsində Android və Nintendo Switch cihazına köçürülə bilər. Xatırladaq ki, 2022-ci ilin sentyabr aylarında hələ təqdim edilməmiş GTA 6 oyununun mənbə kodu da oğurlanmışdı. Hətta mənbə kodları internetə sızdırılmadan əvvəl 50 min dollara satıldığı ilə bağlı iddialar da ortyaa çıxmışdı.
İndi üçüncü tərəf tərtibatçıları bu koddan istifadə edərək GTA 5 oyununu Android, Linux və Nintendo Switch kimi platformalara köçürməyə çalışırlar. Qeyd edək ki, yaxın gələcəkdə androidlərdə GTA 5 oynamaq mümkün ola bilər. Gizmochina mənbəsinə görə, artıq tərtibatçılar ilkin mərhələyə keçid edib. Oyun hazırda yalnız bu platformalarda quraşdırıla bilər və oyunun öz həqiqi funksiyasını yerinə yetirməsi üçün mühüm işlər görülməlidir.
Bilməyənlər üçün qeyd edək ki, video oyun mənbə kodu oyun üçün plan kimi xidmət edən proqramlaşdırma təlimatları toplusudur. Tərtibatçılar əqli mülkiyyəti qorumaq və icazəsiz surətlərin çıxarılmasının və ya dəyişdirilməsinin qarşısını almaq üçün ümumiyyətlə bu kodu gizli saxlayırlar. Bu sızma isə, məşhur oyun tərtibatçısı Rockstar Games üçün əhəmiyyətli nəticələrə səbəb ola bilər. Belə ki, kopyalanan oyunlar, təhlükəsizlik zəiflikləri və müəllif hüquqlarının pozulması ilə bağlı məhkəmə proseslər başlaya bilər.
