Daha əvvəl bir çox beynəlxalq müsabiqələrdə qalib olaraq yüklü miqdarda sərmayə əldə etməyi bacaran Epoint bu dəfə Qazaxıstan VC fondu tərəfindən dəstəklənib. Belə ki, Qazaxıstanın ACTIVAT VC fondu rəsmi hesabında Epoint-ə sərmayə qoyduğunu elan edib. Ümumiyyətlə, Epoint nədir?
Əslində biz bundan əvvəl də Epoint startapı barədə xəbərlər dərc etmişik, xatırlayırsınızsa, ötən il startap 500 Global Akselerasiya proqramından 100 min dollar investisiya almağı bacarmışdı. Qeyd edək ki, bu startap, PAŞA Bankın keçmiş əməkdaşı olan Zeynal Kərimzadə tərəfindən yaradılıb. Bu platforma kiçik və orta sahibkarlar üçün elektron ticarətə tez bir zamanda qoşulma imkanıdır. Məsələn, hansısa mal və ya xidmət satışı ilə məşğulsunuzsa hansısa banka müraciət etməlisiniz. Bu isə olduqca vaxt alan bir prosesdir. Epoint isə bunu maksimum dərəcədə tezləşdirir. Epoint.az startapı ən sadə formada bankdan asılı olmayaraq, istənilən bankın biznes kartını əlavə edib, vəsaitləri qəbul etməyə yarayır. Epoint platforması ilə istifadəçilər (fərd, şirkət) məhsullarını və xidmətlərini onlayn təqdim edərək, ödənişləri onlayn qaydada qəbul edə bilər.
Hazırda bu startapın qeydiyyat keçmiş müştərilərinin ümumi sayı 900-ü ötüb və uğurlu əməliyyatların ümumi sayı da 505 mindir. Qazaxıstan mərkəzli ACTIVAT VC bildirir ki, hazırda Azərbaycanda elektron ticarət bazarının ümumi dəyəri 6 milyard dollar olsa da, kiçik və orta sahibkarlar yalnız bu dəyərin 1%-i həcmində onlayn satışlar həyata keçirir. Məhz bu səbəbdən də Qazaxıstan mərkəzli fond düşünür ki, ölkəmizdə bu sahədə böyük artım potensialı mövcuddur.
