Bildiyimiz kimi, Samsung şirkəti uzun müddətdir ki, qatlanan ekrana sahib olan smartfonlarını bazara çıxarır. Apple isə çoxsaylı istəklərə rəğmən hələ də qatlanan smartfonlara üstünlük vermək istəmir. Beləliklə, Samsung şirkətinin qatlanan displeyləri Apple şirkətinin etibarlılıq testindən keçmir və Apple şirkətinin hələ də qatlanan smartfonlar istehsal etməməsinin əsas səbəblərindən biri də budur. Yəni, Apple, bu cür displeylərin kifayət qədər dayanıqlı olmadığına dair narahatlıqları səbəbi ilə qatlanan iPhone hazırlamağı təxirə salır.
Koreyanın “Naver” mənbəsində yer alan xəbərdə deyilir ki, bu qərar ABŞ mərkəzli şirkətin Samsung daxil digər istehsalçıların qatlanan smartfonlarını sınaqdan keçirdiyini isbat edir. Mənbənin sözlərinə görə, “Apple” mütəxəssisləri elastik ekranlı bir neçə smartfon modelini sökərək yoxlayıb və onlarda istifadə olunan panelləri davamlılıq baxımından sınaqdan keçiriblər. Qeyd edək ki, Samsung qatlanan bilən smartfonlarını yalnız Samsung Display tərəfindən istehsal olunmuş ekranlarla təchiz edib. Əgər Apple şirkəti də qatlanan iPhone istehsal etmək qərarına gəlsə məhz Cənubi Koreyalı şirkətdən bu ekranları tədarük etməli olacaq.
Apple mütəxəssisləri məyusedici nəticəyə gəliblər ki, hazırda Samsung-un elastik displeyləri kifayət qədər davamlı deyil. Panellərin uzun müddət bükülmə və açılma testindən keçə bilmədiyi bildirilir. Hesabatda iddia edilir ki, “Samsung”un elastik displeylərini sınaqdan keçirdikdən sonra “Apple” qatlana bilən “iPhone”ların satışa çıxarılması vaxtının hələ çatmadığına qərar verib. Nəticədə qatlana bilən iPhone-un inkişafı dayandırılıb və onun dəqiq nə vaxt bərpa ediləcəyi məlum deyil. Əvvəllər ilk qatlana bilən iPhone-ların 2026 və ya 2027-ci ildə peyda olacağı barədə şayiələr yayılmışdı. İndi məlum olur ki, bu tarix hələ dəqiq deyil.
