Nəhayət Apple şirkəti 13 ildən sonra əzəli rəqibi Samsung şirkətini smartfon satışlarında geridə qoyaraq taxtdan saldı. Bazar araşdırma şirkəti IDC 2023-cü ildə baş verən qlobal smartfon satışları ilə bağlı yeni hesabat paylaşıb. Belə ki, IDC-nin paylaşdığı bu məlumata görə Apple nəhayət əzəli rəqibini geridə qoymağı bacarıb.
Ümumiyyətlə Samsung şirkəti 2010-cu ildən bəri qlobal smartfon satışlarında Apple şirkətini qabaqlayırdı. Bunun əsas səbəbi isə cənubi koreyalı texnologiya nəhənginin daha çox seqmentdə smartfon istehsal edərək bazara çıxarması idi. Apple sadəcə flaqman səviyyəli iPhone modeli ilə qlobal smartfon bazarına çıxsa da, Samsung bir çox büdcəli, və flaqman modelləri ilə müxtəlif regionlarda smartfon bazarını ələ keçirib. Nəhayət 13 il sonra isə Apple Samsung şirkətini taxtdan saldı və onun liderliyini əlindən aldı.
Qeyd edək ki, ötən il Apple qlobal bazarda 20.1% paya sahib olarkən, Samsung sadəcə cüzi fərqlə 19.4% göstərici ilə onun gerisində qalıb. Ümumi olaraq isə IDC-nin paylaşdığı cədvəldə ilk üçlük məhz Apple, Samsung, Xiaomi brendlərinə məxsusdur. Hesabatda ortaya çıxan digər maraqlı məlumat isə Apple şirkətinin hər keçən il smartfon satışlarındakı göstəricisini artırması olub. Şirkət indi smartfon tədarükünü 226.3 milyondan 234.6 milyona qədər artırmağı bacarıb.
