Maşın öyrənməsi dediyimiz texnologiyaları bu gün bir çox yerdə xəbərimiz belə olmadan istifadə edirik. Sadə formada maşın öyrənməsinin nə olduğunu izah edək. Elə düşünün ki, maşın öyrənməsi hansısa tətbiqin, proqram təminatının, cihazın və ya avadanlığın təkrarlanan alqoritmləri zamanla proqnozlaşdıra bilmə bacarığıdır. Süni intellektlə müəyyən bağlılıq olduğunu da qeyd edə bilərik. Çünki, toplanmış datalar maşın öyrənməsi prinsipində süni intellektin təkmilləşməsinə də kömək edir. Dünyanın ən çox istifadə edilən brauzerlərindən biri olan Chrome tətbiqi üçün də Google maraqlı bir yenilik gətirir. Belə ki, Chrome tətbiqi bundan sonra maşın öyrənməsi bacarığına görə istifadəni daha da yaxşılaşdıracaq. Bunun harda və necə işləyəcəyinə gəlin bir yerdə nəzər salaq.
Maşın öyrənməsi harada tətbiq ediləcək?
Belə ki, daim yenilənərək inkişaf edən Chrome tətbiqi maşın öyrənməsi texnologiyası ilə daha da güclənir. Google tərəfindən Chrome tətbiqinin yeni versiyasında maşın öyrənməsi xüsusiyyətini istifadəyə verilir. Saytlar tərəfindən göndərilən lazımsız bildirişlər istəklərini brauzer bundan sonra özü bloklaya biləcək. Maşın öyrənməsi isə məhz burda işə daxil olacaq.
İstifadəçilərin hərəkətləri maşın öyrənməsi vasitəsilə əvvəlcə analiz edilir. Əgər istifadəçi tez-tez müəyyən bir saytdan gələn bildirişi bağlayırsa Chrome bunu anlayır və gələn dəfə bildirişin göndərilməsi ilə bağlı özü qərar verir. Həmin saytdan gələn bildiriş maşın öyrənməsi ilə əhəmiyyətsiz hesab olunur və sizə ümumiyyətlə göndərilmir. Lakin istifadəçiyə bildirişin avtomatik bloklandığına dair informativ xəbərdarlıq edilir.
Chrome tətbiqinin gələcək versiyalarında maşın öyrənməsi texnologiyası tamamilə brauzer daxilində fəaliyyət göstərəcək. Buna görə də Google serverlərinə məlumatlarınızın göndərilməsinə ehtiyac qalmayacaq. Google, maşın öyrənməsi vasitəsilə zərərli saytları da aşkarlaya biləcək və sizi bu saytlardan qoruyacaq.
Daha bir lazımi yenilik isə saytların dilini avtomatik tərcümə etmə xüsusiyyəti ilə bağlıdır. Maşın öyrənməsi, daxil olduğunuz saytın tərcümə edilməsinə ehtiyac yoxdursa yanlışlıqla avtomatik tərcümə edilməsinin qarşısını alacaq.
Mobil cihazlarda istifadə olunan Chrome tətbiqində də müəyyən dəyişikliklər olacaq. Axtarış hissəsinin kənarında səsli axtarışla bağlı olan düymə istifadəyə bağlı olaraq dəyişəcək. Məsələn, səsli axtarış yerinə paylaşmaqdan daha çox istifadə edirsinizsə orda səsli axtarış düyməsi yox paylaşma düyməsi mövcud olacaq.
