SpaceX şirkətinin Starlink layihəsi artıq hərkəsə məlumdur. Belə ki, kosmosdan birbaşa internet imkanı təqdim edən bu xidmət artıq dünyanın bir çox ölkəsində əlçatandır. Ölkəmizdə də Starlink xidmətinin il ərzində istifadəyə verilməsi gözlənilir. Qeyd edək ki, bir müddət əvvəl Starlink smartfonlara birbaşa internet xidməti təklif edəcəyini açıqlamışdı. İndi idə Starlink layihəsi çərçivəsində SpaceX Falcon 9 ilə birlikdə smartfonlara birbaşa internet imkanı təmin edəcək ilk mobil peykləri (DTC) kosmosa göndərib.
Beləliklə SpaceX yeni ilə sürətli başlanğıc edərək daxil olub. Vandenberg Kosmik Qüvvələri Bazasından orbitə buraxılan peyklərin 6 ədədi mobil internet xidmətini təmin etmək üçün nəzərdə tutulub. Starlink şirkətinin ilk mobil peykləri ilə artıq smartfonlar birbaşa olaraq kosmosdan internet xidməti əldə edə biləcək. Bununla da, istifadəçilər ucqar ərazilərdə və ya fəlakət bölgələrində səs, mətn və digər əlaqə vasitələrindən istifadə edə biləcəklər. Starlink bildirib ki, smartfonları mobil peyklərə qoşmaq üçün heçbir əlavə dəyişikliyə də ehtiyac yoxdur.
Qeyd edək ki, yeni mobil peyklərin kosmosa göndərilməsində əsas məqsəd ilk sınaqların həyata keçirilməsidir. Belə ki, daha əvvəl SpaceX şirkəti ABŞ Federal Rabitə Komissiyasında mobil internet xidmətini sınaqdan keçirmək üçün icazə almışdı. İndi isə Starlink peyklər ABŞ-da smartfonlara internet imkanı təqdim etmək üçün ilk olaraq sınaqdan keçiriləcək. Məhz bu sınağın nəticələrindən asılı olaraq Starlink mobil internet layihəsinin taleyi də həll olunacaq. Elon Musk daha əvvəl açıqlamasında bildirmişdi ki, yeni Starlink DTC peykləri ilə smartfonlar üçün ölü zona problemi aradan qaldırılacaq. O cümlədən onun sözlərinə görə DTC funksiyası mövcud internet şəbəkələri ilə rəqabət aparmayacaq. Belə ki, o yalnız 7 meqabit sürəti dəstəkləyir.
