Qualcomm şirkəti bu dəfə orta seqmen smartfonları gücləndirəcək yeni Snapdragon 7 Gen 3 çipsetini bizlərə təqdim edib. Yeni çipset Snapdragon 8 Gen 3 kimi bir çox yeni funksiya və süni intellekt inteqrasiyası ilə qarşımızdadır. Smartfon bazarının aparıcı oyunçularından biri olan Qualcomm yeni çipsetləri ilə orta seqment smartfonlarda rəqabəti artaracaq. Qeyd etdik ki, yeni çipset bir çox yeni funksiyaya və süni intellekt inteqrasiyasına sahibdir, indi isə gəlin bu yeniliklərə daha yaxından nəzər salaq.
Xatırladaq ki, çipset nəhəngi ötən ay yeni Snapdragon 8 Gen 3 və X Elite çipsetləri ilə gündəmə gəlmişdi. Flaqman cihazlar üçün inanılmaz dərəcədə yüksək performans təklif edən bu çipsetlərin indi orta səviyyəli cihazlar üçün nəzərdə tutulan versiyası təqdim edilib. Qualcomm şirkəti bu dəfə orta seqment smartfon bazarı üçün yeni Snapdragon 7 Gen 3 çipseti ilə gündəm mövzusu olub. Qeyd edək ki, yeni çipset sələfi ilə müqayisədə 15% daha yaxşı performans və 20% daha çox enerji səmərəliliyi təklif edir. Habelə yeni orta səviyyəli çipsetin hər aspekti süni intellekt nəzərə alınmaqla hazırlanıb.
Texniki tərəfdə isə yeni çipset TSMC-nin 4 nm istehsal prosesinə əsaslanır bə 1+3+4 nüvə konfiqurasiyasına malikdir. Müvafiq olaraq çipset 3 ədəd 2,4 GHz, 4 ədəd 1,8 GHz və 1 2.63 GHz tezlikli nüvəyə sahib olub. Snapdragon 7 Gen 3 Hexagon NPU və yeni nəsil Adreno GPU tərəfindən də dəstəklənir. Kamera tərəfində isə çipset 200 MP-ə qədər təsvir ölçüsünü və 4K 60Hz HDR video qeydini dəstəkləyir. Habelə bu çipsetdə 5 Gbps-ə qədər yükləmə sürətini təmin edən Snapdragon X63 5G Modeminə üstünlük verilib. Wi-Fi 6E və Bluetooth 5.3 də çipsetin xüsusiyyətləri arasındadır. Qeyd edək ki, 7 Gen 3 ilə təchiz edilmiş ilk smartfonların ayın sonunda Honor və Vivo tərəfindən təqdim edilməsi də gözlənilir.
