Beləliklə Elon Musk daha bir sahədə gəlir əldə etməyin yolunu tapıb. Belə ki, kosmosdan internet təklif edən SpaceX Starlink artıq zərər etmir və şirkət getdikcə dirçəlməyə davam edir. Qeyd edək ki, SpaceX Starlink layihəsi üçün Falcon-9-a yüklənən peyklər yerin orbitinə siqnallar göndərir. Beləliklə bu peyklər Starlink sisteminin əhatə dairəsini və tutumunu daha da artırır. İlk başlarda SpaceX şirkətinin Starlink layihəsi olduqca yüksək miqdarlarda zərər ilə fəaliyyət göstərib. Daha sonra isə yeni ölkələrdə yeni istifadəçilərin sayı artması nəticəsində bu vəziyyət bitib.
Elon Musk ötən axşam verdiyi açıqlamada bildirib ki, Starlink layihəsi artıq istifadəçi sayınının artması nəticəsində zərər etmir. Lakin Elon bildirib ki, hələ Starlink ilə bağlı hədəfinə tam çatmayıb. Belə ki, o, Starlink xidmətinin gəlirlilik səviyyəsini yüksək təyin edib. Ümumiyyətlə Starlink xidməti gələn il daha bir çox ölkədə o cümlədən Azərbaycanda və Türkiyədə də istifadəyə verilə bilər. Maraqlısı budur ki, ötən günlərdə Starlink Gürcüstanda istifadəyə verildi. Hələlik isə ölkəmizdə bu xidmətdən istifadə etmək mümkün deyil. Lakin hazırda Starlink xidmətindən istifadə edə bilmək üçün 9 dollar ödəməklə rezerv etmək mümkündür.
Kosmosdan yüksək sürətli internet təmin edə bilən Starlink ilə bağlı son bir ildə ən əhəmiyyətli inkişaf T-Mobile və SpaceX-in birgə keçirdiyi tədbirdə qeydə alınıb. T-Mobile CEO-su Mike Sievert və SpaceX-in CEO-su Elon Musk qeyd etdiyimiz tədbirdə xüsusilə “peykdən mobil rabitəyə” infrastrukturu ilə böyük səs-küy yaradıblar. SpaceX şirkətinin yeni nəsil peykləri xüsusi texnologiya vasitəsi ilə dünyada ölü zonaları aradan qaldırmağı hədəfləyir. Yəni SpaceX şirkəti Starlink xidməti ilə bütün dünyada smartfonlara peyk interneti təmin etmək üçün çalışır.
