WWDC 2022 konfransının birinci günü arxada qaldı. Apple ötən gün yeni iOS 16, iPadOS 16, macOS Ventura, watchOS 9 əməliyyat sistemlərini, M2 prosessorunu və MacBook seriyasını təqdim edib. Bu xəbərimizdə sizə əməliyyat sistemləri barədə məlumat verəcəyik.
Apple şirkətinin verdiyi məlumata əsasən, iOS 16 əməliyyat sisteminin tarixində ən böyük kilid ekranı yenilənməsi alacaq. Çoxlu yeniliklər əlavə olunub, məsələn istifadəçilər kilid ekranında olan məlumatların şriftini və rəngini dəyişə və divar kağızlarına yeni üslublar əlavə edə biləcəklər. Həmçinin vidjetlər əlavə olunub, hansıların köməkliyi ilə siz kilidi açmadan qulaqcığın şarjını, havanı v.s. kimi məlumatları görə biləcəksiniz.
iOS 16 əməliyyat sistemində əsas yeniliklər
iOS 16 əməliyyat sistemində bildirişlər istifadəçinin divar kağızının görüntüsünü bağlamasın deyə, artıq karusel formasında ekranın aşağı hissəsində çıxacaqlar. Maraqlı vidjetlər arasına Live Activities əlavə olunub. Bu vidjet ilə istifadəçi fərqli məlumatları real zamanda izləyə bilər. (məsələn çağırılmış taksinin statusunu izləmək). Ən vacib yeniliklərdən biri isə, iOS 16 əməliyyat sistemində bir neçə kilid ekranı yaratma imkanının gətirilməsi olub. Hər birisi üçün özünüzə uyğun üslub seçə bilərsiniz.
Mesajlar bölümündə, iOS 16-da uzun müddət istifadəçilər tərəfindən gözlənilən üç yeni funksiya əlavə edilib. Birinci yenilik, artıq göndərilmiş mesajın redaktə etmə imkanın əlavə edilməsidir. İkinci yenilik göndərilmiş mesajların silinməsi olub. Sonuncu yenilik isə, cavab gözlədiyiniz mesajları unutmamaq üçün xüsusi işarələmə özəlliyi olub. Nəticədə iOS 16 istifadəçiləri səhv etmə qorxusu olmadan mesaj göndərə bilərlər.
iOS 16 yenilənməsində, klaviaturadan istifadə zamanı səs vasitəsi ilə və əl ilə yazmaq arasında sabit keçid əlavə edilib. Hər iki funksiyanı eyni zamanda istifadə etmək mümkündür. Məsələn, siz mesajı səsli şəkildə əlavə edə və ardıyca əl ilə yaza bilərsiniz.
Daha öncə təqdim edilən Live Text (canlı mətn) funksiyası iOS 16-da böyük yeniləmə alıb. Artıq istifadəçilər təkcə şəkillərdən yox, həmçinin videolardan da mətnləri kopyalayıb tərcümə edə bilərlər. Bunun üçün siz sadəcə video çarxı dayandırıb və mətnin üzərinə basaraq kopyalaya bilərsiniz. Eyni zamanda siz artıq şəkildə olan istənilən obyektin üzərinə basaraq onu kəsib ayrıca mesaj ilə göndərə bilərsiniz. iOS 16 əməliyyat sistemində tədbiq edilən ən faydalı yeniliklərdən biri ola bilər.
iOS 16 ilə Apple Pay Later təqdim edilib
Yeni iOS 16-da Apple Pay Later funksiyası da təqdim edilib. Bu funksiya hesabına hər hansı alışı bir neçə hissəyə bölərək ödəyə bilərsiniz (kredit kimi). Bu funksiya barədə tam ətraflı məlumat verilməsə də, Apple Pay olan hər yerdə keçərli olacağı açıqlanıb. Apple şirkəti hər hansı faiz və ya gecikməyə görə cərimələr tədbiq etməyəck.
Digər yeniliklərə fokuslanma funksiyasının təkmilləşdirilməsini göstərə bilərik. İstifadə etdiyiniz iş və şəxsi saytları, mesajları və e-məktubları v.s. çeşidləmək mümkün olacaq. Family Shares funksiyasının köməkliyi ilə, iOS 16-da istifadə etdiyiniz servisi 5 ailə üzvünüz ilə bölüşə bilərsiniz. iCloud Photo Shared Library 5 istifadəçiyəümumi albom yaradmağa imkan verir.
Aşağıdakı cihazlar iOS 16 yeniləməsini alacaq:
- iPhone 13 seriyası;
- iPhone 12 seriyası;
- iPhone 11 seriyası;
- iPhone XS və iPhone XS Max;
- iPhone XR;
- iPhone X;
- iPhone 8 və iPhone 8 Plus;
- iPhone SE (2020) və iPhone SE (2022).
Apple iOS 16 ilə bərabər yeni watchOS 9 tanıdılıb
iOS 16 ilə yanaşı Apple şirkəti watchOS 9 ƏS təqdim edib. Burada yeni siferblatlar (üslublar), vidjetlər və yeni fitnes-funksiyaları əlavə olunub. Yeni əməliyyat sistemi bu ilin payızında istifadəyə verilməlidir.
WWDC 2022 tədbirində watchOS 9 təqdimatında əsas diqqəti siferblatlara yönləndiriblər. Əlavə olaraq yeni Metropolitan şrifti, yenilənmiş Siri istifadə interfeysi və aktiv tədbiqlərə tez daxil olmaq üçün pin (ekranda saxlama) etmə funksiyası nümayiş edilib. iOS 16 olduğu kimi, istifadəçilər burada da bir neçə kilid ekranı ayarlaya bilərlər.
Yeniliklər ilə bol olan watchOS 9
Yeni ƏS qaçmağı sevənlər üçün bir çox funksiyalar əlavə olunub. Məsələn siz kardio üçün xüsusi ərazilər qeyd edə bilərsiniz. Bu halda saat sizə müəyyən ürək döyüntü ərazisində nə zaman olduğunuzu və nə qədər davam etdiyini göstərəcək. Yeni qaçış göstəriciləri də əlavə olunub. Qaçış növü, addım uzunluğu və yer ilə təmas müddəti kimi detallar göstərilib.
Yeni watchOS 9 əməliyyat sistemi ilə işləyən saatlar indi ürək fibrilasiyasını fərqli əlamətlər ilə, düzgün dərman qəbul etməni və onların bir-biri ilə uyğunluğunu, həmçinin yatdığınız zaman yuxu mərhələlərini müəyyən edə bilərlər. Apple artıq fitnes tədbiqini təkcə Apple Watch olanlar üçün yox, bütün iPhone (təkcə iOS 16 yox) istifadəçiləri üçündə istifadəyə verdi.
watchOS 9 ƏS beta versiyası artıq istifadəyə verilib. Yeni ƏS aşağıdakı cihazlarda quraşdırmaq mümkün olacaq:
- Apple Watch SE;
- Apple Watch 4;
- Apple Watch 5;
- Apple Watch 6;
- Apple Watch 7;
iPadOS 16 – Planşetlər də diqqətdən kənarda qalmayıb
Apple tərəfindən tanıdılan digər yenilik iPadOS 16 əməliyyat sistemi olub. Əsas dəyişikliklər çox-tapşırıqlı menyusu ilə bağlı olub. Bunun hesabına iPad kompyuter istifadə təcrübəsinə daha da yaxınlaşıb. iPadOS 16 ƏS-də çox-tapşırıqlı menyu adını dəyişərək Store Manager adlandırıblar. Bundan sonra istifadə edilən tədbiqlər ekranın sol hissəsində səliqəli şəkildə əks olunacaq. Tətbiqlərin pəncərələri avtomatik olaraq ardıcıl göstəriləcək.
Apple planşetləri iPadOS 16 ilə noutbuklardan geridə qalmayacaqlar
Eyni zamanda açıq olan tədbiqin pəncərə ölçülərinin dəyişdirmə funksiyası da əlavə olunub. Digər vacib məsələ isə, 6k-qədər qoşulan xarici ekran təkcə görüntünü təkrarlamayacaq. İstifadəçilər iPadOS 16 hesabına artıq əlavə ekran istifadə edə biləcəklər. Planşetin özündə iki, ekranda isə eyni zamanda 5 tətbiq ilə işləyə biləcəksiniz.
Mesaj funksiyası vasitəsi ilə, istifadəçilər Pages, Keynote, Numbers və qeydlər üzərində birgə işləmək üçün linklər göndərə biləcəklər. 12,9 düymlük iPad Pro sahibləri xüsusi rejim alacaqlar. Burada istifadəçilərə SDR və HDR rəng standartlarını əks etmə imkanı veriləcək. Bunun hesabına planşeti peşəkar grafika işləri üçün istifadə edə biləcəksiniz.
Apple şirkəti iPadOS 16 əməliyyat sisteminə Metal 3 dəstəklənməsini əlavə edib. Bu dəstəkləmənin hesabına daha da valehedici oyunlar istifadəyə veriləcək. Həmçinin Apple xüsusi API istifadəyə verəcək. Nəticədə iPad üçün macOS səviyəsində tətbiqlər hazırlamaq mümkün olacaq .
Aşağıdakı iPad modelləri iPadOS 16 ƏS yükləyə biləcəklər:
- iPad Pro (bütün modellər);
- iPad Air 3-cü nəsil və daha yeni;
- iPad 5-ci nəsil və daha yeni;
- iPad mini 5-ci nəsil və daha yeni.
Yeni texnologiya və funksiyalar ilə bol macOS 13 Ventura ƏS
WWDC 2022 tədbirində Apple şirkəti iOS 16 , iPadOS 16, watchOS 9 əməliyyat sistemlərinin ardıyca yeni macOS 13 Ventura əməliyyat sistemini tanıdıb . Burada, iOS 16-da olduğu kimi, yeni funksiyalar əlavə olunub. Birinci yenilik – Stage Control funksiyasıdı. Bu yeniliyin əsas özəlliyi istifadə edilən pəncərənin yanında digər pəncərələrin avtomatik düzülməsidir. Bu funksiya hesabına, istifadəçi lazımı pəncərəni daha tez tapa bilər. Sistem pəncərələri tədbiqlərə uyğun qruplaşdırır, amma siz özünüzə uyğun qruplar yarada bilərsiniz.
Axtarış sistemi olan Spotlight da təkmilləşdirilib. Artıq bu funksiya ilə istifadəçilər görüntülərin üzərində olan yazılar ilə faylları tapa bilərlər. Görüntülərin üzərində mətnin tanınması sistem səviyəsinə çatdırılıb.
Təkmilləşdirilmiş E-Mail və Passkeys texnologiyası
E-Mail tətbiqi də yenilənib. Burada siz gecikmə ilə məktub göndərə və xatırlatmalar yarada bilərsiniz. Mail daxilində axtarış, artıq məktublara əlavə edilmiş fayllarda axtarmağa imkan verir. Safari brauzeri isə sistem resurslarını daha qənaətli şəkildə istifadə edir.
Passkeys texnologiyası – digər bir yenilik oldu. Bu texnologiya ilə tətbiqlərin şifrələrini siz Apple serverlərində saxlamayacaqsınız. İddialara görə, sistemə yalnız istifadəçinin girişi olacaq. İdentifikasiya üçün şifrə əvəzinə biometriya istifadə olunur. Bu texnologiyanın iOS 16 əməliyyat sistemində tətbiqi haqqında məlumat yoxdur.
Bundan əlavə, Continuity funksiyasının imkanları genişlənib. Bunun hesabına siz aparılan zəngi digər Apple cihazına keçirə bilərsiniz.
iPhone (iOS 16 olması mütləq deyil) kamerası isə macOS üçün veb-kamera kimi istifadə edilə bilər. Həmçinin zəng zamanı siz paralel olaraq görüntün öz ekranınız ilə bölüşə bilərsiniz (FaceTime, Zoom və Teams-da olduğu kimi).
Və nəhayət ki, M2 çipləri ilə çalışan Mac kompüterləri, oyunları yüksək keyfiyyət ilə aça biləcəklər. Bu Metal 3 texnologiyası hesabına həyata keçirilir. Bununla bağlı macOs üçün artıq bir neçə oyun açıqlanıb: Resident Evil: Village və No Man’s Sky.
Apple CarPlay isə tamamilə dəyişib. 2023-cü ildə çıxacaq avtomobillərdə qarşımıza çıxması gözlənilir. Yeni Apple CarPlay sanki iCar elektromobili üçün hazırlanmış multimedia ekranını bizə indidən göstərib. Apple CarPlay-in yeni variantında tək multimedia barədə yox, avtomobillə bağlı demək olar hər bir məlumatı öyrənmək mümkün olacaq.
