Apple ötən aylarda yeni iPhone seriyasını təqdim etdikdən sonra gündəmdən düşmək bilmirdi. İndi isə amerikalı texnologiya nəhəngi Apple yeni M3 prosessorlu iMac seriyasını bizlərə təqdim edib. Bundan əlavə texnologiya nəhəngi M3 seriyalı prosessorların təqdim etdiyi Scary Fast təqdimatını keçirdi. Bu seriya 3 nanometr proses texnologiyasından istifadə edərək istehsal olunan üç fərqli SoC-dən ibarətdir. Hallowen üçün xüsusi olaraq təşkil edilən tədbirdə həmçinin M3 prosessorları ilə təchiz edilmiş ilk Apple cihazları da bizlərə təqdim edilib.
3 nanometr proses texnologiyasından istifadə edərək istehsal olunan M3 prosessorları Apple şirkətinin yeni iMac modellərinə inanılmaz səviyyədə performans təklif edir. Xatırladaq ki, ilk dəfə 2021-ci ildə Apple iMac seriyasını M1 prosessoru ilə təchiz etmişdi. 3 ilə yaxındır ki, heç bir yenilənmə almayan cihaz bu dəfə M3 prosessoru ilə texniki tərəfdən yenilənib. Rəngarəng dizaynı ilə cəlbediciliyini qoruyan iMac modelləri sadəcə texniki tərəfdən yenilənib. Belə ki, cihaz 11.4 mm qalınlığa və 24 düymlük 4.5K təsvir ölçülü Retina ekrana sahib olub. Qeyd edək ki, bu ekran istifadəçilərə 11.3 milyon piksel və bir milyarddan çox rəng təqdim edə bilir.
Apple bildiriri ki, yeni M3 prosessorlu iMac modelləri sələfindən müvafiq olaraq 4 dəfəyə qədər sürətlidir. Yeni iMac 1080p FaceTime HD kamerasına da sahib olub. Habelə yüksək keyfiyyətli 6 ədəd dinamik səs sistemi və studiya keyfiyyətli mikrofonlar cihazı öz rəqiblərindən fərqləndirir. Bluetooth 5.3 və Wi-Fi 6E kimi bağlantıları dəstəkləyən cihaz 24-2TB yaddaş seçiminə də sahib olub. Maraqlısı budur ki, 7 fərqli rəng seçimi ilə təklif olunan cihazın qiyməti sabit qalıb. Belə ki, 8-256GB yaddaşa sahib olan iMac modeli 1299 dollar başlanğıc qiymətinə sahib olub. Cihazın satışa çıxarılacağı tarix isə 10 noyabr olaraq müəyyən olunub.
