Bu gün qatlana bilən cihazların sayı bazarda elə də çox deyil. Məhz bu boşluğu doldurmaq üçün isə texnologiya nəhəngləri işə qoyulub. Belə ki, Apple şirkəti də qatlana bilən iPad üçün artıq bütün gücü ilə işə qoyulub. Analitiklərə görə, Apple 2024-cü ilin sonu və ya 2025-ci ilin əvvəlində yeni qatlanan bilən planşet təqdim etmək istəyir. Ümumiyyətlə Apple uzunmüddətdir ki, qatlana bilən cihazlar seqmentindən uzaqdır. Hətta şirkətin hələ də qatlana bilən smartfon və ya planşeti mövcud deyil.
Hazırda qatlana bilən smartfon və ya planşet tərəfində liderlik Samsung, Google, Huawei, Honor və Motorola brendlərinə məxsusdur. Bununla belə Apple şirkətinin də özünəməxsus dizayn və üsul ilə yeni qatlana bilən iPad üzərində işlədiyi iddia edilir. Hətta iddialar özünü doğruldarsa gələn ilin sonlarında biz yeni qatlana bilən iPad ilə tanış ola bilərik. Əslində Apple şirkətinin qatlana bilən smartfon və ya planşet hazırlaması ilə bağlı daim iddialar meydana gəlir. Lakin indi bu iddialar intensivləşib.
Canalys hesabatına görə, bu il 37 yeni qatlana bilən cihaz təqdim edilib. 2019-cu ildə cəmi 0,3 faiz paya malik olan bu artan premium smartfon seqmentinin bazar payı artıq 5 faizə yüksəlib. Bununla belə, Apple-ın qatlana bilən bazara girməkdə gecikməsi əldən verilmiş bir fürsət kimi qiymətləndirilir. Apple isə əldən verdiyi fürsəti yenidən qazanmağa çalışaraq yeni iPad hazırlayır. Hətta bununla bağlı məşhur analitik Ming-Chi Kuo da proqnoz vermişdi. Onun sözlərinə görə Apple şirkətinin yeni qatlana bilən cihazı yüngül karbon fiber dayağa sahib olacaq.
