Daha əvvəl Xiaomi şirkətinin MIUI interfeysi ilə artıq işini bitirdiyini qeyd etmişdik. Belə ki, çinli nəhəng artıq yeni interfeysə keçid edəcəyini bildirmişdi. İndi isə rəsmi olaraq 13 illik MIUI interfeysi tarixə qovuşdu və yeni Xiaomi HyperOS elan edildi. Qeyd edək ki, söhbət tamamilə sıfırdan qurulmuş yeni arxitekturaya əsaslanan interfeysdən gedir. Yəni Xiaomi MIUI adını sadəcə HyperOS-a çevirməyib, interfeysi tamamilə yenidən qurub.
Qeyd edək ki, 2017-ci ildən tamamilə yeni nəsil “VELA” arxitekturası üzərində inkişaf etdirilmiş HyperOS sadəcə smartfonlarda olan MIUI-dan fərqli olaraq avtomobillər, AIoT cihazları, aksesuarlar və.s üçün ortaq sistemə (interfeysə) çevriləcək. Hələlik sıfırdan qurulmuş bu interfeysin necə dizayna sahib olacağı və ya hansı yeni xüsusiyyətlərə sahib olacağı barədə məlumat yoxdur. Lakin əminliklə deyə bilərik ki, Xiaomi yeni interfeysi ilə cihazlarını rəqiblərindən daha üstün hala gətirməyə çalışacaq.
O cümlədən qeyd edək ki, HyperOs interfeysi ilkin mərhələdə Çində yaxın günlərdə Xiaomi 14 seriyası ilə birlikdə ictimaiyyətə təqdim ediləcək, lakin məlumata görə qlobal bazar üçün 2024-cü ildə yayımlanacaq. Xiaomi CEO-su Lei Jun qeyd edir ki, “Bu gün tarixi bir məqamdır. İllərdir birlikdə üzərində işlədikdən sonra yeni əməliyyat sistemimiz HyperOS, yeni flaqman Xiaomi 14 seriyası ilə rəsmi debüt etməyə hazırlaşır. Yeni HyperOS və əlimizdən gələn hər şey üçün çox həyəcanlıyıq”.
