Bulud əsasında oyun idealogiyası artıq genişlənir. Belə ki, Sony şirkəti PlayStation 5 bulud axını xidmətini bu ay istifadəyə verəcək. Xatırladaq ki, bu funksiya Nvidia şirkəti tərəfindən istifadə edilirdi. Hətta Geforce Now hazırda milyonlarla istifadəçi tərəfindən geniş istifadə olunur. Həmçinin bu xidmət getdikcə dünyanın hər tərəfinə yayılır. İndi isə Sony şirkəti Nvidia-nın yolundan gedir. Artıq hərşey hazırdır və Sony bu xidməti bu ay istifadəyə verəcək.
Maraqlısı budur ki, yeni PlayStation 5 bulud axını vasitəsi ilə istifadəçilər sadəcə internet üzərindən oyunları oynaya biləcək. Yəni artıq heçbir oyunu yükləməyə ehtiyac yoxdur. Onu da qeyd edək ki, bu xidmət hələlik PlayStation Plus Premium üzvləri üçün istifadəyə verilir. İlk mərhələdə sadəcə seçilmiş oyunlar üçün əlçatan olacaq bu xidmət gələcəkdə daha da təkmilləşəcək. Belə ki, ilk mərhələdə PlayStation Plus Oyun Kataloqundan ən populyar PS5 oyunları, cümlədən Marvel’s Spider-Man: Miles Morales, Horizon Forbidden West, Ghost of Tsushima, Mortal Kombat 11 və Saints Row IV bu xidmət ilə istifadəçilərə təklif olunacaq.
Hogwarts Legacy, The Witcher 3: Wild Hunt və The Calisto Protocol kimi oyunlar üçün isə hazırda sadəcə oyun testləri əlçatan olacaq. Onu da qeyd edək ki, istifadəçilər 60 FPS və SDR və ya HDR çıxışı ilə 4K, 1440p, 1080p və 720p daxil olmaqla yüksək keyfiyyətli oyun təcrübəsi yaşaya biləcək. Yaponiya üçün 17 Oktyabr, Avropa üçün 23 Oktyabr və Şimali Amerika üçün 30 Oktyabrdan etibarən istifadəyə veriləcək bu xidmətdən istifadə etmək üçün ən azı 5mbps internet lazım olacaq. Habelə 1080p keyfiyyət üçün 15 mbps, 4K üçün isə minimum 38mbps internet sürəti tələb olunur.
