Süni intellekt sahəsinin aparıcı adlarından biri olan OpenAI DALL-E 3 sün intellekt əsaslı render sistemini təqdim edib. Bildiyimiz kimi, şirkət uzunmüddətdir ki, süni intellektə əsaslanan render sistemi sahəsində DALL-E ilə çıxış edir. Hətta bu gün texnologiya nəhəngi bu sahədəki fəaliyyətini daha da artırmaq üçün render sisteminin yeni versiyasını təqdim edib. Yenilənmiş render sistemi ilə mətnlər artıq daha incə detallarla bəzədilmiş və yüksək dəqiqliklə şəkillərə çevriləcək. Görünən odur ki, OpenAI sadəcə ChatGPT çatbotunun uğurları ilə yetinməyib, süni intellekt sahəsindəki mövqeyini gücləndirir.
Maraqlısı budur ki, OpenAI şirkəti tərəfindən elan edilən DALL-E 3 süni intellekt əsaslı render sistemi ChatGPT Plus və ChatGPT Enterprise abunəçiləri üçün əlçatan olacaq. Bundan əlavə yeni sistem əvvəlki versiya ilə müqayisədə inanılmaz dərəcədə təkmilləşib. Artıq render sistemi təsvirlər üzərində daha yüksək dəqiqliklə işləyə bilir. Həmçinin şirkət açıqlamasında bildirir ki, “DALL-E 3, təsvirlərin yaradılmasında DALL-E 2-dən qat-qat yaxşı işləyir. Məsələn, DALL-E 3 müəyyən obyektləri və onların əlaqələrini ehtiva edən səhnəni dəqiq şəkildə göstərə bilər”.
Ümumi olaraq deyə bilərik ki, artıq DALL-E 3 ilə daha rahat və yüksək dəqiqliklə təsvirlər yaratmaq mümkündür. Çünki yeni sistem sələfi ilə müqayisədə məkan əmrlərini daha yaxşı başa düşür. Habelə istifadəçilərin təsvir etdiyi yerdə fiqurlar və obyektləri bir-biri ilə əlaqələndirir. Dəyişməyən tək şey odur ki, yenədə nifrət, zorakılıq məzmunları yaratmaq bu sistemdə də məhdudlaşdırılıb.
