Gözlənilən gün nəhayət gəlib çatdı. Apple brendi Wonderlust tədbirində yeni Watch Series 9 və Watch Ultra 2 modellərini təqdim etdi. Bir neçə saat əvvəl baş tutan tədbirdə əvvəlcə yeni Watch 9 seriyası, daha sonra Watch Ultra 2 və iPhone 15 seriyası təqdim edildi. Habelə tədbirin giriş hissəsində bizlərə Apple cihazlarının xilas etdiyi həyatlar barədə qısa fraqment göstərildi. Onu da qeyd edək ki, yeni ağıllı saat modeli sələfindən elə də fərqlənmir, lakin yenə də bir sıra təkmilləşdirmələr mövcuddur. Eynilə Watch Ultra 2 modelində də bəzi mühüm təkmilləşdirmələr mövcuddur. Ümumiyyətlə deyə bilərik ki, Apple bu il bizlərə innovasiya yox inkişaf təqdim etdi. Gəlin görək Apple brendinin yeni Watch 9 seriyası bizlərə hansı yeniliklər və təkmilləşdirmələr təklif edir?
Yeni Apple Watch 9 seriyası hansı yeniliklərə sahibdir?
Dizayn tərəfindən başlayaq. Beləliklə ilk baxışda yeni ağıllı saat seriyası bizlərə heç bir yenilik vəd etmir. Əvvəlki nəsildə olduğu kimi yeni saatlar 2 ölçüdə 41 mm və 44 mm olmaqla təklif edilir. Korpus materialları isə alüminium, paslanmaz polad və titan olmaqla fərqli versiyalarda təklif olunur. Qeyd edək ki, yeni Apple Watch Series 9 modellərində texnologiya nəhəngi ekoloji təmiz materiallardan istifadə etməyə üstünlük verib. Belə ki, Apple Watch S9 ilə %100 geri çevrilmiş kobalt və sport qayışda %82 geri çevrilmiş iplik istifadə olunacaq. Ekran tərəfində isə 41 mm versiyada 352 x 430 piksel təsvir ölçülü 1.9 düymlük ekran, 45 mm versiyada isə 396 x 484 piksel təsvir ölçülü ekran bizi qarşılayır.
Habelə LTPO OLED ekranların parlaqlığı 2000 nitə qədər arta, gecələr isə 1 nitə qədər düşə bilir. Performans tərəfində isə bizləri 30% daha güclü S9 çisepti qarşılayır. Bundan əlavə S9 çipseti batareya tərəfində də daha güclü olacaq. Yeni Watch S9 saatı istifadəçilərə 18 saat batareya ömrü təklif edir. Maraqlıs budur ki, Watch S8 modeli də bizlərə 18 saat batareya ömrü təklif edirdi. Batareya ömrü dəyişməsə də, şarj sürəti müəyyən qədər təkmilləşib. Yeni saat modeli sadəcə 45 dəqiqə ərzində 80% şarj ola bilir.
Təbii ki, Apple sadəcə performans tərəfində deyil funksiya tərəfində də, yeni Apple Watch S9 modellərində yenilk edib. Belə ki, bu dəfə daha təkmilləşmiş əl jestləri ilə idarəetmə funksiyası bizlərə təqdim edilib. Artıq Doupla Tap yəni iki dəfə barmağınızı şaqqıldatmaqla zənglərə cavab verə biləcəksiniz. Əslində bu xüsusiyyət bizlərə 2 il əvvəl fiziki məhdudiyyətli insanların ağıllı saatlardan daha asan istifadəsi üçün təqdim edilmişdi. İndi bu funksiya hərkəs üçün əlçatandır. Hələlik watchOS 10 bizlərə təqdim edilməsə də, yeni əməliyyat sistemi ilə vidjet, məşq funksiyaları da yenilənəcək.
Yeni Apple Watch Ultra 2 modeli hansı yeniliklərə sahibdir?
Tədbirin digər yeni modellərindən biri də Watch Ultra 2 oldu. Belə ki, Apple şirkəti Watch seriyasının premium modeli hesab olunan Ultra seriyasına daha bir yeni saat əlavə etdi. Bu dəfə tamamilə titan korpus və sapfir materialına sahib olan saat, daha ekstremal şəraitə tab getirə bilir. 49 mm korpus ölçüsünə sahib olan yeni Watch Ultra 2 saatı 1.92 düymlük LTPO OLED ekrana sahib olub. Ekranın parlaqlığı isə bu dəfə 3000 nitə qədər artırılıb. Onu da qeyd edək ki, Apple Watch Series 9 modellərinə əlavə edilən yeni Double Tap funksiyası bu modelə də əlavə olunub.
Performans tərəfindən yenindən bizi S9 çipseti qarşılayır. Onu da qeyd edək ki, yeni S9 çipseti sələfindən 60 faiz daha çox tranzistora sahibdir və 30 faiz daha sürətlidir. Həmçinin uzun müddətdir istifadə edilən U1 çipi U2 Ultra Wideband çipi ilə əvəz olunur. Beləliklə, Watch Ultra 2 yer dəqiqliyi baxımından daha uğurlu olacaq. Batareya tərəfində isə yeni saat modeli gözləntirləri qarşılamadı. Hətta həm Apple Watch Series 9 həm də yeni Watch Ultra 2 modeli bizi batareya cəhətdən məyus etdi. Yeni Watch Ultra 2 modelinin batareya ömrü 36 saat olaraq sabit qaldı.
Yeni təqdim edilən saatların ən maraqlı cəhəti isə qiymətləridir. Belə ki, yeni Apple Watch Series 9 41 mm versiyası 399$ və 499$, 45 mm versiyası isə 429$ və 529$ olmaqla təklif olunur. Yeni Watch Ultra modeli isə 799$ qiymət etiketi ilə təklif olunacaq. Onu da qeyd edək ki, 10 gün sonra yəni 22 sentyabrdan yeni saatlar rəsmi mağazalarda satışa çıxacaq.
