OnePlus şirkətinin keçmiş qurucusu Carl Pei tərəfindən əsası qoyulan Nothing şirkətinin yeni Phone (2) smartfonunun qiyməti artıq məlum olub. Belə ki, ortaya çıxan qiymət etiketlərinə əsasən yeni modelin qiyməti gözləniləndən daha baha olacaq. Gələn ay təqdim edilməsi gözlənilən smartfonun yeni dizaynı barədə məlumatlar da ortaya çıxmışdı. Yeni smartfonun sələfindən çox cüzi fərqlənəcəyi gözlənilir.
Qeyd edək ki, ortaya çıxan məlumatlar Carl Pei tərəfindən də təsdiqlənib. İyulun 11-də təqdim edilməsi gözlənilən smartfon Avropada 729 avro başlanğıc qiyməti ilə satılacaq. Bu qiymət yeni smartfonun 8-256GB versiyası üçün keçərlidir. 12-512GB versiya isə sadəcə 849 avroya təklif ediləcək. Maraqlısı budur ki, yeni smartfon 8-128GB versiyaya malik olmayacaq. Lakin Nothing Phone (1) modeli 8-128 yaddaş seçimi ilə 469 avroya təklif olunmuşdu. Yekun olaraq deyə bilərik ki, Nothing Phone (2) modelinin qiyməti sələfindən 2 dəfə baha olacaq.
Ümumiyyətlə Nothing Phone (2) modeli renderlərə əsasən, ümumi estetikasını və erqonomikasını yaxşılaşdıran dizayn dəyişiklikləri gətirməlidir. Smartfonun ön və arxa panellərində cüzi 2.5D qıvrım var ki, bu da dairəvi çərçivə ilə birləşərək onu əlinizdə möhkəm tutmağı asanlaşdırır. Telefonun sələfindən daha böyük 6,7 düymlük ekrana sahib olduğunu nəzərə alsaq, bu məntiqlidir. Bundan əlavə, simsiz doldurma portunun üzərindən keçən LED işıqlandırma da bir neçə hissəyə bölünür. Bu, istifadəçiyə orijinal işıq effektləri yaratmağa və Glyph interfeysini daha fərdiləşdirilə bilən etməyə imkan verəcək.
