Meta Muse süni intellekt agentini ayrıca fiziki cihaza çevirməyə hazırlaşır. Şirkətin Connect tədbirində Mark Zukerberq tərəfindən nümayiş etdirilən Muse Charm kiçik ölçüsü və Tamagotchi-ni xatırladan dizaynı ilə diqqət çəkib. “Engadget”-in məlumatına görə, Cihaz istifadəçiyə telefon və ya tətbiq açmadan birbaşa Muse ilə danışmağa imkan verəcək.
Muse Charm-ın ön hissəsində kiçik ekran yerləşir. Burada süni intellekt agentini təmsil edən və dəyişdirilə bilən avatar göstərilir. Cihazın daşınması üçün kiçik asqısı da var ki, bu da onu açarlıq kimi istifadə etməyə imkan verir. Ekranın avatar göstərməkdən əlavə hansı funksiyaları yerinə yetirəcəyi hələ açıqlanmayıb.
Cihazın yuxarı hissəsində barmaq izi sensoru yerləşdirilib. İstifadəçi sensora toxunaraq Muse-u aktivləşdirə və dərhal onunla danışmağa başlaya bilir. Muse Charm-da həmçinin kiçik kamera və ən azı üç mikrofon var. Meta-nın məqsədi süni intellekt agentinə çıxışı mümkün qədər sürətli etmək və bunun üçün telefonun açılması ehtiyacını aradan qaldırmaqdır.
Mark Zukerberq bildirib ki, şirkət Muse-un real vaxt rejimində səs və avatar texnologiyalarını açarlığa sığacaq ölçüdə cihaza yerləşdirib. Bununla belə, Muse Charm-ın internetə və Meta serverlərinə hansı üsulla qoşulacağı barədə hələ ətraflı məlumat verilməyib.
Hazırda Muse Charm kommersiya istehsalına hazır məhsul deyil. Meta cihazın cəmi bir neçə prototipini hazırlayıb və yekun versiyada istifadə olunacaq materiallar da müəyyənləşdirilməyib. Şirkət məhsulu dekabr ayında, ilin sonundakı alış-veriş mövsümünə qədər satışa çıxarmağı planlaşdırır.
Meta paralel olaraq Muse-un proqram imkanlarını da genişləndirir. Süni intellekt agenti gələcəkdə istifadəçilərlə canlı video formatında ünsiyyət qura biləcək. İstifadəçilər Muse avatarının həm görünüşünü, həm də səsini fərdiləşdirə biləcəklər. Bunun üçün yeni Muse Realtime Avatar modelindən istifadə olunacaq.
Muse agentlərinə ayrıca elektron poçt ünvanlarının verilməsi də planlaşdırılır. Agentlər bu ünvan vasitəsilə istifadəçi ilə əlaqə saxlaya və verilmiş tapşırıqları yerinə yetirərkən elektron poçtdan istifadə edə biləcəklər. Muse-un Mac tətbiqinə isə kompüteri birbaşa idarə etmək imkanının əlavə olunacağı bildirilir.
Meta Muse-u ağıllı eynəklərinə də inteqrasiya etməyə hazırlaşır. İstifadəçi eynək vasitəsilə Muse-un adını söyləyərək agenti aktivləşdirə biləcək. Kamera ilə təchiz edilmiş modellərdə isə Muse istifadəçinin qarşısındakı obyekt və mühiti analiz edərək onlar haqqında verilən suallara cavab verə biləcək.
