Uzunmüddətdir ki, ölkəmizdə də fəaliyyət göstərən Bolt şirkəti Starship ilə kuryer robotları barəsində razılıq əldə edib. Qeyd edək ki, Starship technologies robot kuryerləri ilə bir çox şirkət ilə əməkdaşlıq edir. Onlardan biri də məhz taksi sifariş xidməti üzrə ixtisaslaşan Bolt şirkətidir. Belə ki, baş ofisi Estoniyanın Tallin şəhərində yerləşən şirkət pilotsuz robotlar ilə öz xidmətlərini genişləndirəcək. Hətta şirkət bu il ərzində yeni robotlardan istifadə edərək qida çatdırılması etməyi də planlaşdırır.
Bolt şirkətinin qurucusu və baş icraçı direktoru Markus Villig bildirir ki, “Biz yerli nəqliyyatı mümkün qədər etibarlı etməyə kömək edəcək həllərin tapılmasına diqqət yetiririk”. Qeyd edək ki, Bolt şirkəti yeni kuryer robotları ilə ilk olaraq Tallin sakinləri üçün xidmət göstərəcək. Əgər uyğun infrastruktur müxtəlif ölkələrdə də yaradılarsa, gələcəkdə bu xidmətin daha geniş ərazilərə hətta Azərbaycana qədər genişlənməsi nəzərdə tutula bilər. Əsas məsələ partnyor şirkətlərin mövcudluğu kimi nəzərdə tutulur. Kuryer sifariş robotu restoranda paketi təslim aldıqdan sonra GPS üzərindən müştərinin ünvanına doğru hərəkət edəcək. Təbii ki, bir çox kamera sensorlarına malik olan bu robotlar yol boyunca rastlaşacaqları maneələrin öhdəsindən asanlıqla gələcəklər. Yekunda isə müştəri sadəcə proqramdan düyməni basaraq robotdan paketi təslim alacaq.
Qeyd edək ki, 2013-cü ildə yaradılan Bolt şirkəti hazırda dünyanın bir çox bölgəsində o cümlədən Avropa, Afrika, Yaxın şərq və Latın Amerikasındakı 45-dən çox ölkədə 100 milyona yaxın müştəriyə xidmət edir. İndiyə qədər şirkət Sequoia, IFC, Dünya Bankı və Avropa İnvestisiya bankı kimi prestijli təşkilatlardan 2 milyard dollardan çox vəsait toplayıb. Hazırda isə şirkət 8.4 milyard dollar dəyəri ilə Avropanın ən bahalı texnologiya şirkətləri sırasındadır.
