YouTube yeni CEO-su ilə yeni dövrə başlayacaq. Belə ki, Youtube platforması reklam bloklayıcıları aktiv olduqda fəaliyyətini dayandırmağı sınayır. Bununla da məşhur şirkət qeyri-qanuni üsullar ilə reklamsız video izləyənlərin qarşısını almağa çalışır. Bildiyimiz kimi məşhur platformanın gəlirlərinin əsas hissəsi məhz reklamlar vasitəsi ilə əldə edilir. Hətta reklamları izləmək istəməyən istifadəçilər üçün YouTube Premium təklif olunur. Burada isə istifadəçilər aylıq müəyyən vəsait ödəyərək Premium hesab abunəçisinə çevrilirlər.
Bəzən isə reklam bloklayıcıları ilə istifadəçilər reklam izləmədən platformadan istifadə edə bilirlər. Bunun fərqində olan şirkət isə reklam bloklayıcılarını aşkar etdikdə fəaliyyətini dayandırmağı sınaqdan keçirir. Google istifadəçilərin qarşısına “YouTube-da reklam bloklayıcıları qadağandır” ifadəsini çıxararır. Həmçinin Google bildirir ki, platformanın dünyadakı milyonlarla insan üçün pulsuz fəaliyyət göstərməsinin əsas səbəbi məhz reklamlardır. Reklamları izləmək istəməyənlərə isə tövsiyə edir ki, YouTube Premium hesablarından istifadə etsinlər. Qeyd edək ki, YouTube şirkətinin yeni baş icraçı direktoru Neil Mohan, keçən ay platforma üçün böyük açıqlamalar vermişdi. O bildirmişdi ki, yaxın gələcəkdə platformaya süni intellekt alətləri də əlavə ediləcək. Beləliklə isə platforma video bloqerlər və izləyicilər üçün tamamilə fərqli məkana çevriləcək.
Yeni süni intellekt alətləri vasitəsi ilə video yaradıcıları xəyal etdikləri bütün kontentləri reallaşdıra biləcəklər. Hətta onlar qısa filmlər də çəkə bilər. Mohan bildirib ki, “Süni intellekt inanılmaz yaradıcılıq imkanları təqdim edir, lakin onlar düzgün balanslaşdırılmalıdır”. Bundan əlavə isə platformaya başqa yeniliklər də əlavə ediləcək. Lakin bütün bunlardan qabaq YouTube reklam bloklayıcılarına qarşı bir həll yolu axtarmağa çalışır. Çox güman ki, yaxında platformada reklam bloklayıcı aktiv olduqda video izləmək mümkün olmayacaq.
