Google şirkəti I/O 2023 texnologiya tədbirində milyardlarla Android cihazdan ibarət axtarış sistemi yaradacağını elan edib. Belə ki, texnologiya nəhənginin cihazını tap xidməti tezliklə yalnız smartfonların deyil, digər cihazların da yerini göstərməyə imkan verən böyük bir yenilənmə alacaq. Hətta texnologiya nəhəngi bildirir ki, bu sadəcə yenilənmə olmayacaq, tamamilə yeni axtarış sistemi olacaq. Hansı ki, bu axtarış sistemi milyardalarla android əsaslı cihazı əhatə edəcək.
Google şirkətinin məhsul idarəçiliyi üzrə vitse-prezidenti Samir Samat texnologiya tədbirində çıxış edərkən bəzi açıqlamalar edib. O bildirib ki, hal-hazırda cihazımı tap xidməti GPS, A-GPS və internet bağlantısı məlumatlarından istifadə edərək smartfonların yerini xəritədə aşkar etməyə imkan verir. Lakin sadəcə bir neçə aydan sonra müxtəlif brendlərdən olan qulaqlıqların, planşetlərin və digər cihazların yerini də müəyyənləşdirmək olacaq. Bununla da Google şirkəti geniş əhatəli axtarış sistemi yaradacaq. Ümumiyyətlə Google bunu necə bacaracaq?
Google şirkətinin cihazımı tap xidməti GPS, A-GPS və internet bağlantısı olmayan qulaqlıqlar, planşetlər və digər cihazlarda yaxınlıqlarda olan digər smartfonlar vasitəsilə fəaliyyət göstərəcək. Məsələn Galaxy SmartTag izləyicisi heç bir bağlantıya sahib olmasa da yaxınlıqda olan istənilən Galaxy smartfonundan istifadə edərək öz yerini bildirir. Google şirkətinin yeni axtarış sistemi də bu tərzdə fəaliyyət göstərəcək. Google şirkəti artıq gizlilik problemini aradan qaldırmağa çalışır. Qeyd edək ki, yeni axtarış sisteminin nə zaman istifadəyə veriləcəyi hələlik məlum deyil.
