Google I/O 2023 tədbirində elan edilən əsas yeniliklərdən biri də məhz Google Search axtarış sisteminin süni intellekt tərəfindən hazırlanan şəkilləri aşkar etməsi oldu. Bildiyimiz kimi, son dövrlərdə geniş yayılan Midjourney tərzli süni intellekt alətləri sadəcə 2-3 sözə uyğun olaraq istənilən şəkili yarada bilirdi. Bu isə öz növbəsində dezinformasiyanın artmasına gətirib çıxarırdı. Texnologiya nəhəngi tədbirdə elan etdi ki, süni intellektin hazırlayacağı bütün vizual effekt və şəkillər Google Search axtarış sistemi tərəfindən aşkar ediləcək.
Google Search axtarış sisteminin süni intellekt tərəfindən hazırlanan şəkilləri aşkar etməsi üçün funksiyalar təqdim edilib. Belə ki, yeni funksiyalar Google Search sisteminə inteqrasiya ediləcək. Artıq Google axtarış sistemində qarşılaşdığınız şəkilin haqqında bölməsində “Süni intellekt tərəfindən yaradıldı” ifadəsini görmək mümkün olacaq. Google şirkətinin təqdim etdiyi yeni funksiya süni intellekt əsasında şəkillərin hazırlanmasını qadağan etmir. Sadəcə həmin şəkillərin kim tərəfindən hazırlandığını ortaya çıxarır. Bununla da, həmin şəklin real və ya saxta olduğunu anlamaq mümkün olacaq. Bundan əlavə isə yeni funksiya ilə birlikdə istifadəçilər axtarış sistemindəki şəkillər haqqında daha çox məlumat əldə edə biləcəklər.
Yeni funksiya süni intellekt ilə hazırlanan şəkilləri aşkar etsə də dezinformasiyanın yayılmasının qarşısını ala bilməyəcək. Çünki, süni intellekt əsasında hazırlanan dezinformasiya xarakterli şəkillər əsasən Google ekosistemindən kənarda yayılır. Bununla belə Google Search axtarış sisteminə inteqrasiya ediləcək yeni funksiyalar şəkillərin nə zaman indeksləndiyini, ilk dəfə harada ortaya çıxdığını və hansı platformalarda paylaşıldığını və süni intellekt tərəfindən hazırlanıb-hazırlanmadığını bildirəcək. Bu ilin sonunda istifadəyə veriləcək yeni funksiya hələlik ABŞ ilə məhdudlaşacaq və yalnız ingilis dilində olacaq. Lakin gələcəkdə funksiya daha da təkmilləşdirilə bilər.
