Sony şirkəti yeni flaqman Xperia 1 V və orta büdcəli Xperia 10 V smartfonlarını təqdim edib. Bununla da Xperia seriyası daha da genişlənib. Qeyd edək ki, texnologiya nəhənginin yeni Xperia 1 V modeli daha əvvəl təqdim edilmiş Xperia modellərindən elə də fərqlənmir. Belə ki, smartfon yastı kənarlara və simmetrik ekran çərçivəsinə, habelə arxa tərəfdə 3 kamera sensoruna sahibdir. Xperia 1 V modeli daha keyfiyyətli material hissiyatı və daha müasir dizayn təklif etsə də, brendin yeni orta büdcəli Xperia 10 V modeli üçün eynisini demək mümkün deyil. Xperia 10 V modeli də yastı kənarlara, simmetrik ekran çərçivələrinə sahib olsa da daha fərqli kamera dizaynına sahibdir. Ümumiyyətlə hər iki smartfonun ön tərəfində heç bir kamera çıxıntısı yoxdur.
Yeni Sony Xperia 1 V smartfonu hansı xüsusiyyətlərə sahibdir?
Qeyd edək ki, texnologiya nəhənginin yeni flaqman Xperia 1 V modeli öz gücünü Snapdragon 8 gen 2 çipsetindən alır. Smartfon 6.5 düymlük 4K HDR təsvir ölçülü OLED ekran paneli ilə təchiz edilib. Olduqca yüksək keyfiyyətli ekran panelinin görüntü yeniləmə tezliyi 120Hz təşkil edir. Qeyd edək ki, smartfonun ekran paneli Gorilla Glas Victus 2 ilə qorunur. 165 x 71 x 8.3 mm ölçülərində olan smartfon sadəcə 187 qram ağırlığındadır. Android 13 əməliyyat sistemi ilə təchiz edilən smartfonun başlanğıc qiyməti 1400 avro təşkil edir.
Kamera tərəfində isə Xperia 1 V smartfonu 52MP Exmor T seriyalı əsas kamera sensoru ilə təchiz edilib. Həmçinin smartfon 12MP ultra geniş bucaqlı və 12 MP telefoto sensorları ilə təchiz edilib. Ön tərəfdə isə yeni flaqman smartfon 12MP kamera sensoruna malik olub. Batareya tərəfində smartfon 30 Vatt sürətli şarj dəstəkləyən 5000 mAs həcmli batareya ilə təchiz edilib. Bundan əlavə isə smartfon 12-256GB yaddaş seçimi ilə təklif ediləcək. Lakin microSD kart ilə yaddaşı 1TB-a kimi artırmaq mümkün olacaq. IP68 sertifikatına sahib olan smartfon NFC texnologiyası və 3.5 mm jack girişi ilə təchiz edilib.
Yeni Xperia 10 V smartfonu hansı xüsusiyyətlərə sahibdir?
Sony brendinin yeni orta seqmentdən olan Xperia 10 V modeli isə öz gücünü Snapdragon 695 çipsetindən alır. Smartfon 6.1 düymlük FHD+ OLED ekran paneli ilə təchiz edilib. Bundan əlavə Xperia 10 V modelinin də ekranı Gorilla Glass Victus ilə təchiz edilib. Xperia 10 V modeli brendin yeni flaqmanından fərqli olaraq 60 Hz görüntü yeniləmə tezliyinə malik ekran paneli ilə təchiz edilib. 1155 x 68 x 8.3 mm ölçülərində olan smartfon sadəcə 159 qram ağırlığındadır. Android 12 əməliyyat sistemi ilə təchiz edilən smartfonun başlanğıc qiyməti 500 avro təşkil edir.
Kamera tərəfində isə Xperia 10 V smartfonu 48MP əsas kamera sensoru ilə təchiz edilib. Həmçinin smartfon 8MP ultra geniş bucaqlı və 8MP telefoto sensorları ilə təchiz edilib. Ön tərəfdə isə yeni orta seqment smartfon 8MP kamera sensoruna malik olub. Batareya tərəfində smartfon 21 Vatt sürətli şarj dəstəkləyən 5000 mAs həcmli batareya ilə təchiz edilib. Bundan əlavə isə smartfon 6-128GB yaddaş seçimi ilə təklif ediləcək. Lakin microSD kart ilə yaddaşı 1TB-a kimi artırmaq mümkün olacaq. IP68 sertifikatına sahib olan smartfon Hi-RES dəstəkli 3.5 mm jack girişi ilə təchiz edilib.
Görünən odur ki, Sony brendi Xperia seriyasının ənənəvi xüsusiyyətlərinə sadiq qalmağa çalışır. Belə ki, artıq böyük şirkətlər bir çox smartfon modelində 3.5 mm jack girişindən istifadə etmədiyi halda Sony hələ də öz ənənəsini davam etdirir. Eyni fikir microSD kart üçün də keçərlidir. Dizayn tərəfində isə smartfin hələ də çərtik dizaynına keçid edə bilməyib. Məhz buna görə də deyə bilərik ki, yeni Sony Xperia modelləri sələflərindən demək olar ki, fərqlənmir.
